Kreu i Departamentit të Sigurisë në PD, Enkelejd Alibeaj akuzoi sot kryeministrin Edi Rama se marrë në mbrojtje dhunuesin e biznesmenit libanez, Fad Mitri.
Ky i fundit u largua para disa ditësh nga Shqipëria për shkak të dhunimit që i bënë, duke tërhequr edhe investimin nga vendi ynë.
Alibeaj tha se i dyshuari është bërë publik me emër dhe figurë, ndërsa sipas tij Rama mashtron kur tha se autorët janë ndaluar, por i ka liruar gjykata.
“Dhunuesi brutal i biznesmenit që braktisi vendin dhe investimin 450 milionë dollarësh me 1200 vende pune, është lirë, edhe pse Edi Rama e di se kush është, e di fare mirë se ku ndodhet.
Ja ku është i dyshuari i identifikuar nga i dhunuari dhe familja e tij, Landi Muharremi. I dyshuari ka emër dhe fytyrë dhe është denoncuar nga vetë viktima. Kjo foto iu tregua mbrëmë Edi Ramës në ekran, në emisionin Opinion, dhe ai heshti. Jo vetëm heshti, por u kap dhe në mashtrim kur tha se autorët janë ndaluar, por i paska liruar gjykata”, tha Alibeaj.
“Banditi që shëtit i lirë, është vetëm vegla e përdorur në këtë skenar kriminal e mafioz. Në të vërtetë, investitori u largua nga Edi Rama, sepse toka në Gjirin e Lalzit do të ndahet si plaçkë me oligarkët e tij. Kjo është e vërteta. Ky është realiteti.
Edi Rama nuk është i interesuar për një investim serioz që i sjell ekonomisë 450 milionë dollarë, krijon 1200 vende pune. Edi Rama është i interesuar ta ndajë këtë pasuri me oligarkët, me banditët, me kartelet e tij të drogës”, theksoi Alibeaj.
