Deputetja e Partisë Socialiste Mimoza Hafizi ka thënë sot në Kuvend se në Shqipëri janë dyfishuar burimet për lëndët e para ndërkohë që lejimi i importit të tyre është një non sens.
“U ngrita të replikoj shifrat që kryeministri dha për të justifikuar importin e mbetjen në vitin 2016. M’u duk argument absurd, le ta gjykojë gjithsecili. Ai tha që në 2013 janë ricikluar 10% e mbetjeve të vendit dhe kemi pasur këtë biznes riciklimi. Kurse në 2016 ka shkuar në 17-18%. Pra normalisht burimet e lëndëve të para për këtë biznes janë dyfishuar. Dhe burimet janë dyfishuar, ndërkohë që ne lejojmë importin. Kur burimet e lëndëve të para ishin gjysma ne nuk e lejuam importin. Nëse ka njeri që e kupton këtë argument, një njeri që di të numërojë nga 1 te 20 unë i kërkoj ndjesë, por unë realisht nuk e kuptoj”, tha Hafizi.
Por kjo shprehje e deputetes socialiste ka vënë në siklet kryeministrin Edi Rama.
Ky i fundit duke i kthyer përgjigje Hafizit, përsëriti të njëjtat argumente.
“Po ia shpjegoj deputetes që të ndihet njeri”, tha Rama duke mbrojtur ligjin sipas të cilit industria e riciklimit është ekonomi e gjelbër.
“Pse importojnë kompanitë suedeze mbetje, apo ato francezet? Sepse janë lëndë e parë, është zinxhir ekonomik, nuk është mbetje që i ngeli dikujt tjetër dhe ta lë ty. Janë lëndë të para që tregtohen në bursë”, tha ndër të tjera kryeministri.
Por argumentet e përsëritura të kryeministrit askush nuk arrin t’i kuptojë.
