Autoriteti Kombëtar i Ushqimit ka kryer inspektime në 3 tregjet kryesore në Tiranë, ku janë marrë masa me gjobë deri në paralajmërime për bllokim aktiviteti.
AKU ka kryer kontrolle në Tregun e Kombinatit, në Tregun në hyrje të Ish-Uzinës “Dinamo” dhe në Tregun Agro-Ushqimorë në rrugën Tiranë-Durrës.
Inspektorët e AKU kanë konstatuar se, shumica e subjekteve tregtonin produkte, duke mos plotësuar kushtet higjeno-sanitare.
Konkretisht, produktet si djathë, peshk, gjalpë, gjizë, ullinj, mish etj, tregtoheshin jashtë ambienteve, duke mos u mbajtur në frigoriferë, ashtu siç e parashikon ligji.
Inspektorët e Drejtorisë Rajonale të AKU-së Tiranë, kanë vendosur gjoba për 10 subjekte.
Gjithashtu këto biznese janë paralajmëruar për bllokim të produkteve, nëse do të konstatohet se,i tregtojnë përsëri ato, në ambientet jashtë biznesit.
Gjobat që ka vendosur Autoriteti Kombëtar i Ushqimit në vetëm një ditë, kapin shifrën e 2.350.000 lekë.
