NGA KLODIAN TOMORRI
Meqenëse argumenti kryesor dhe i vetëm i qeverisë për ligjin e plehrave është ai ekonomik është me shumë interes të shihet pak se sa e rëndësishme është industria e riciklimit në ekonominë shqiptare.
1-Punësimi
Sipas qeverisë industria e riciklimit punëson 3 mijë vetë, të cilët do të humbisnin punën nëse nuk do të hapej importi i mbetjeve.
Sipas INSTAT, në total Shqipëria ka 1 milion e 100 mijë të punësuar. Kjo do të thotë se industria e riciklimit jep 0.27 për qind të punësimit në vend.
2-Investimet
Sipas qeverisë industria e riciklimit ka investuar mbi 130 milionë euro në Shqipëri. Shifra është kumulative për 25 vjet.
Sipas INSTAT (PBB me metodën e shpenzimeve) në total investimet vjetore në ekonominë shqiptare arrijnë rreth 450 miliardë lekë ose 3.2 miliardë euro.
Kjo do të thotë se investimet kumulative 25-vjeçare të industrisë së riciklimit janë pak më shumë se 3 për qind e investimeve që bën ekonomia vetëm në një vit.
3- Përfundimet
Nëse të gjithë punonjësit e industrisë së riciklimit do dilnin të papune, papunësia në Shqipëri do rritej me 0,1 pikë për qindje dhe nga 15.9 për qind që është do shkonte në 16 për qind
Le të supozojmë se industria e riciklimit investon 20 milionë euro në vit (shifra reale është disa herë më e ulët). Pra edhe nëse investimet e riciklimit do të zeroheshin fare, investimet totale të ekonomisë do të uleshin vetëm me 0.7 për qind, ndërsa efekti në rritjen ekonomike do të ishte 0,02 pike përqindje.
Pra rritja ekonomike do shkonte nga 2.96 në 2.94 për qind.
Të gjithë llogarite e mësipërme janë bërë marrë duke parasysh efektet negative që mund të ketë industria e mbetjeve në turizëm, apo në kostot shëndetësore shtese. Nëse do merreshin parasysh edhe ato mund të rezultojë që mbyllja e industrisë së riciklimit mund të ketë efekte pozitive në ekonomi duke zgjeruar Prodhimin Kombëtar. Por kjo mbetet për t’u testuar.
(Boldnews.al)
