Biznesmeni i dhunuar Faad Mitri, i cili u largua ditë më parë nga Shqipëria duke tërhequr të gjitha investimet, ka zënë një pjesë të mirë të fjalimeve dhe debateve sot në seancën plenare. Madje pati nga ata deputetë edhe brenda maxhorancës që sollën dy raste aspak të krahasueshme për të cilat ka reaguar shteti.
Deputeti i PS, Artan Gaçi ka ironizuar Ministrin e Brendshëm Saimir Tahiri, i cili pak ditë më parë publikoi videon ku dy policë shpëtonin një kotele që kishte ngecur në pjesën e poshtme të makinës.
“Ndërsa në një anë rrihet një biznesmen, në krahun tjetër shpëtohet një kotele”, tha Gaci nga foltorja.
Më tej, Gaçi foli për biznesmenin e dhunuar, i cili u detyrua të linte Shqipërinë.
“Investitori që la Shqipërinë me barelë ishte një pamje e dhimbshme, ndërsa ngjarja që e detyroi të largohej për mua është një terrorizëm i pastër. Terrorizëm ndaj çdo sipërmarrësi vendas apo të huaj, terrorizëm jo vetëm ndaj të ardhmes dhe turizmit, por edhe të Shqipërisë. Prej 25 vitesh vazhdon e përsëritet e njëjta histori, biznesmenë që guxojnë, provojnë dhe pothuajse gjithmonë dështojnë. Kështu ndodhi me Kakomenë që na çoi 10 vite pas në turizëm, kështu ndodhi edhe këtë javë që na çoi edhe 10 vite të tjera pas”, u shpreh Gaçi.
