Shoqëria civile, ashtu siç kishte paralajmëruar ka rinisur protestën para parlamentit, ndërkohë që në seancë pritet të miratohet ligji për importin e mbetjeve.
Dhjetëra qytetarë dhe aktivistë të mbrojtjes së mjedisit i kërkuan deputetëve të mos e votojnë ligjin që rrezikon mjedisin dhe shëndetin e shqiptarëve.
Aktivistët deklaruan se importi i mbetjeve lidhet ngushtë me interesat mafioze dhe synon ta kthejë Shqipërinë në një kosh plehrash.
“Aleanca Kundër Importit të Plehrave deklaron se lejimi i importit të plehrave që pritet të shqyrtohet sot në Kuvendin e Shqipërisë është një akt tradhtie ndaj interesave të popullit shqiptar, një pabesi politike ndaj votuesve dhe një akt që synon ta kthejë Shqipërinë në një kosh plehrash të Europës” u shpreh AKIP në një deklaratë për shtyp.
