Mbyllet materniteti në Mat, 1 muaj pa gjinekolog

Prej një muaji Spitali i Matit ka mbetur pa mjek gjinekolog. Mungesa e mjekëve specialistë ka krijuar probleme serioze për jetën dhe shëndetin e grave shtatzëna. Ky shqetësim është ngritur dhe më herët, por tashmë ka kaluar një muaj që kur materniteti i spitalit “Xhavit Mara” nuk ka mjek obstetër gjinekolog.
Largimi i mjekut Pjetër Meci ka lënë vakant vendin e një specialisti të tillë. Ndërkohë, drejtori i spitalit Burrel, Dritan Neli, theksoi për mediat se të paktën tri shkresa ia ka adresuar institucionit të shëndetësisë dhe ka kërkuar emërimin e një mjeku obstetër gjinekolog në Maternitetin e Burrelit.
Nëse para një muaji kishte mesatarisht 13¬15 gra të shtruara në këtë repart, aktualisht të gjithë shtretërit janë të boshatisur. Personeli i mesëm nuk guxon të marrë përsipër shtrimin e shtatzënave në spital, pasi nuk mund të kryhen lindje.
“Ne, – thanë bluzat e bardha të Maternitetit Burrel, – aktualisht nuk mund të kryejmë vizita për gratë shtatzëna. Aparaturat përdoren vetëm nga mjekët gjinekologë. Në rastet kur vijnë urgjenca, ne bashkëpunojmë me drejtorinë e spitalit dhe pacientja niset drejt spitaleve të Tiranës ose Lezhës, me autoambulancë ose me helikopter”.
Kur flasin për problemet e krijuara muajin e fundit, ato kujtojnë se për lindjen e shtatzënës në Milot në mjetin e transportit, dikush duhet të mbajë përgjegjësi. Infermieret dhe mamitë e Burrelit shprehen se u duket i tepërt qëndrimi në punë, kur ato nuk kanë mundësi t’u afrojnë ndonjë shërbim pacienteve që mbërrijnë në maternitet.
“Është e pafalshme që të mos ketë maternitet për rrethin e Matit me 60 mijë banorë, kur dihet se nevojat janë të shumta. Vijnë gra shtatzëna nga zonat e thella të Xibrit, Macukullit, Derjanit etj., por atyre nuk u jepet asnjë ndihmë e profilizuar për shqetë¬ simin që ato kanë. Nuk është zgjidhje dërgimi i tyre në Tiranë e Lezhë. Gratë në lindje kanë nevojë për ndihmë urgjente. Ngjarja e ndodhur në kryeqytet duhet të alarmojë drejtuesit e shëndetësisë”, shtuan infermieret e Burrelit.
Drejtori i spitalit “Xhavit Mara” Burrel, Dritan Neli, tha për mediat se shqetësimi i ngritur është shumë i drejtë. Ai shtoi se të paktën tri herë i është drejtuar me shkresa zyrtare Ministrisë së Shëndetësisë, duke i kërkuar emërimin e një mjeku obstetër gjinekolog në Maternitetin e Burrelit. “Kemi dërguar shkresa të vazhdueshme në dikaster dhe kemi kërkuar zgjidhje të këtij shqetësimi. Aktualisht nuk kemi asnjë mundësi për t’u ardhur në ndihmë grave shtatzëna. Urgjencat i kemi dërguar me ambulanca ose helikopter në Tiranë dhe Lezhë. Kjo nuk është zgjidhje”, theksoi Neli. Edhe më kritike paraqitet gjendja në Maternitetin e Bulqizës. Prej më shumë se një viti në rrethin verilindor me më shumë se 40 mijë banorë mungon mjeku gjinekolog. Urgjencat dërgohen kryesisht në Peshkopi, mbi 60 km larg. Panorama