Sherri për pacelat me hashash, vrau me thikë shokun. Policia jep detajet

Parcelat me hashash kanë qenë shkaku i sherrit mes dy shokëve në Gramsh ku ka përfunduar me vrasjen e 29 vjeçarit.

Policia ka dhënë detaje të reja lidhur me ngjarjen e ndodhur mbrëmjen e djeshme. Dy shokët pasi kishin pirë bashkë në lokal, kishin debatuar me njëri-tjetrin dhe më pas ishin larguar.
Por vetëm pak më vonë, 29-vjeçari Ardian Mesiti ka shkuar në shtëpinë e shokut të tij, Arlind Llalla, për t’u sqaruar, në praninë edhe të babait të këtij të fundit.
Por pasi ka dalë nga banesa e tyre, 25-vjeçari Llalla dhe dy persona të tjerë i kanë ngritur pritë në rrugë 29-vjeçarit, duke e qëlluar me thikë. Pasi kanë parë se 29-vjeçari ndërroi jetë, ata kanë njoftuar policinë, duke u thënë se kanë parë një person të vrarë në rrugë.
Sipas Policisë së Gramshit, autori Arlind Llalla, 25 vjeç, është larguar nga vendngjarja, por aty ka harruar xhupin dhe celularin.
Vetëm disa minuta më pas është bërë i mundur edhe arrestimi i autorit të ngjarjes. Sakaq policia ka arrestuar edhe një tjetër person, i cili dyshohet se ka parë konfliktin, por nuk ka kallëzuar ngjarjen dhe motivet.
Ky është rasti i dytë në një hark kohor prej një jave, ku një person vritet për parcelat e drogës. Në 15 shtator një tjetër i ri mbeti i vrarë në Dukagjin, pas konfliktit për parcelat me kanabis.

NJOFTIMI I POLICISE
Pas njoftimit të marrë se në rrugën automobilistike të fshatit Llallë Gramsh, është gjetur një person i vrarë me mjete të mprehta.
Menjëherë në vendngjarje kanë mbërritur efektivat e policisë dhe kanë konstatuar se viktima i përket shtetasit A.M 29 vjeç, banues në fshatin Shemrize Gramsh.
Gjatë këqyrjes së vendit të ngjarjes, janë gjetur dhe sekuestruar në cilësinë e provës materiale:
një ciklomotorr, një aparat celular që dyshohet se i përkasin viktimës; një xhup i zi dhe një aparat celular që dyshohet se i përkasin autorit të dyshuar për këtë ngjarje.
Si rezultat i veprimeve të shpejta operacionale dhe hetimore, specialistët për Krimet e Rënda, në Drejtorinë Vendore të Policisë Elbasan, në bashkëpunim me efektivat e Komisariatit të Policisë Gramsh, bënë arrestimin në flagrancë të shtetasve:
Arlind Llalla, 25 vjeç, banues në fshatin Llallë Gramsh
Arrestimi i tij, u bë pasi gjatë një konflikti për motive të dobëta, në rrugën automobilistike të fshatit Llallë Gramsh dyshohet të ketë goditur me mjet të mprehtë (thikë) shtetasin A.M, 29 vjeç, i cili ka gjetur vdekjen e menjëhershme.
Ndaj tij materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Vrasje me dashje” dhe “Prodhimi dhe mbajtja pa leje e armëve të ftohta” parashikuar nga neni 76/1 dhe 279/1 të Kodit Penal.
Ø Xhuljan Kokomeci, 39 vjeç, banues në fshatin Llallë Gramsh.
Arrestimi i tij, u bë pasi dyshohet të ketë parë ngjarjen dhe të mos ketë kallëzuar për motivet dhe rrethanat e ngjarjes.
Ndaj tij materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale “Moskallëzim Krimi” parashikuar nga neni 300 i Kodit Penal.