“E ardhmja e Shqipërisë është turizmi dhe bujqësia e jo Cannabisi”. Kështu ka deklaruar nga Korça kreu i Kuvendit Ilir Meta duke i kërkuar politikës, përfshi dhe maxhorancën të marrin një vendim e të mos i shmangen këtij fenomeni. Meta përmend edhe ndërkombëtarët dhe sipas tij edhe ata duhet të ndërhyjnë
“Politika duhet të marrë një vendim e nuk duhet t’i shmanget, dhe jo vetëm politika por dhe partnerët ndërkombëtarë, që janë të interesuar për të ardhmen e vendit, si një vend kandidat për BE”, deklaroi Meta.
Por si duket kjo deklaratë nuk i ka pëlqyer ministrit të Brendshëm, Saimir Tahiri, i cili megjithëse thotë se mbështet Metën, ‘thumbon’ atë. “Kush bën sot sikur çuditet, i shmanget qëllimisht të vërtetës se kanabisi ishte një fenomen i kudondodhur, por i fshehur nga sytë e publikut deri në vitin 2013”, thotë Tahiri, kur deri në 2013, Meta ishte në qeveri me të djathtën.
Po kështu Tahiri i kujton edhe raportet e ndërkombëtarëve, sipas të cilave, ka rezultate mbresëlënëse në luftën kundër këtij fenomeni.
“E ndaj plotësisht opinionin e kryetarit të Kuvendit që kanabisi nuk luftohet duke iu shmangur të vërtetës, gjë që Partia Demokratike po e bën fatkeqësisht çdo ditë! Kush bën sot sikur çuditet, i shmanget qëllimisht të vërtetës se kanabisi ishte një fenomen i kudondodhur, por i fshehur nga sytë e publikut deri në vitin 2013, nga një qeveri e polici që mjaftohej me komunikata sekrete për rrënjët anembanë Shqipërisë, dhe garantonte fitimet marramendëse të Republikës së Lazaratit! Ndërsa kush çuditet pafajësisht sot nga ky fenomen, është viktimë e asaj politike të vjetër që i shmangej përpalljes me fenomenin duke e mbajtur jashtë vëmendjes së opinionit e të mediave!
Ilir Meta ka shume të drejtë kur thotë se duhen dëgjuar edhe ndërkombëtarët.
Kanë folur shumë qartë për vite me radhë, ndaj sot është inkurajim i madh çdo germë e raporteve të Departamentit të Shtetit dhe Gurdia di Finanza-s të cilat e kanë cilësuar luftën tonë të tanishme shumë shkoqur; ‘rezultate mbresëlënëse, falë angazhimit të lidershipit politik’.
Natyrisht që kjo është një luftë që është larg së qeni e fituar, por siç do të tregojnë faktet e shifrat që kemi bërë publike e do bëjmë në vazhdim së bashku me partnerët tanë ndërkombëtarë, është një luftë me rezultate që deri përpara tre vitesh as që mund të parafytyroheshin”, shkruan Tahiri.
