Policia e Tiranës në bashkëpunim me Prokurorinë kanë bërë identifikimin e personave të dyshuar të përfshirë në goditjen me sende të forta ndaj biznesmenit libanez Fadi Mitri, ndodhur më datë 10 shtator 2016.
Një ditë më parë, policia ka arrestuar një prej autorëve të dyshuar, Skënder Kraja, 26 vjeç, banues në Durrës, i dënuar më parë.
Ky shtetas në bashkëpunim me dy të tjerë dyshohet se më datë 10 shtator 2016, në aksin rrugor, Kashar-Rinas, pas një përplasje mjetesh, i cili ka degraduar në konflikt fizik, kanë goditur me sende të forta duke i shkaktuar dëmtime, shtetasit Fadi Mitri, 55 vjeç, banues në Tiranë. Gjatë kontrollit në banesë iu gjet e sekuestrua 35 gram lëndë e dyshuar narkotike e llojit kanabis sativa.
Gjithashtu janë referuar materialet në Prokurorinë e Rrethit Gjyqësor Tiranë dhe punohet për kapjen e shtetasve V. D., 32 vjeç, banues në Sukth, Durrës dhe L. M., 39 vjeç, banues në Sukth, Durrës.
Materialet proceduriale iu kaluan Prokurorisë së Rrethit Gjyqësor Tiranë, për veprat penale “Plagosja e lehtë me dashje e kryer në bashkëpunim” dhe “Prodhimi dhe shitja e narkotikëve”. Policia po punon për kapjen e dy shtetaseve të tjerë të dyshuar si autorë të ngjarjes.
