Partia Demokratike ka përforcuar sot tezën e saj që në Dibër nuk humbi opozita, por se u vodhën votat.
Në një dalje për mediat nga selia blu, deputeti Oerd Bylykbashi tha se grupi i strukturuar kriminal ka ndarë miliona lekë për të blerë votat.
“Rastet e publikuara në media, apo ditën e zgjedhjeve janë dëshmi jo thjesht të blerjes së votës. Ato dëshmojnë se në Dibër funksionoi një skemë e mirëorganizuar me fond dhe pagatorë të vënë në dispozicion për blerjen e votës.
Funksionarë të lartë të Bashkisë, kryekëshilltarja e Keshillit bashkiak, dhe vëllezërit e Muharrem Ramës janë kapur me zë e me figurë duke kryer krimin elektoral.
Ndërkohë që Partia Demokratike po përgatit raportin e plotë e të detajuar të rasteve te evidentuara që janë vetëm indiciet e kësaj masakre me votën në Dibër, ne i bëjmë thirrje prokurorisë të lëvizë, të hetojë e të marrë në përgjegjësi penale, për rastet e njohura deri tani, të bëra publike në media dhe nga qytetarët”, tha Bylykbashi.
“Dibra është prova se zgjedhje të lira me Edi Ramën dhe kartelin e tij të drogës nuk ka. Lufta totale me Kartelin e Drogës, krimit dhe korrupsionit sapo ka filluar”, theksoi në fund të deklaratës së tij Bylykbashi.
Por në konferencën për shtyp Bylykbashi nuk sqaroi se si opozita do ta luftojë të ashtuquajturin “kartel droge” dhe pse nuk e luftoi që në zgjedhjet e Dibrës?
