Partia Demokratike denoncoi se në Maqëllarë banorët dhe strukturat e saj kapën një zyrtar të lartë të Drejtorisë së Tatimeve, ndërsa akuzoi shefin e komisariatit si personin që drejton sipas selisë blu strukturën kriminale të ngritur nga PS për të tjetërsuar votën e dibranëve.
“Banorët e Maqellarës kapën në mesnatë duke shpërndarë lekë për blerje votash zyrtarin e Drejtorisë së Tatimeve Artan Isaku, vartës i shtetasit Dionis Ymeri me detyre Drejtor i Tatimeve për Dibrën. Dionis Ymeri është kallëzuar penalisht nga Partia Demokratike në prokurori me date 1 shtator si anëtar i grupit të strukturuar kriminal për blerje votash në fushatën e Dibrës. Konkretisht shtetasi Dionis Ymeri, me detyrë Drejtor i Drejtorisë Rajonale të Tatimeve në Dibër, është kallzuar në Prokurori si personi përgjegjës i ngarkuar me detyrën e sigurimit të fondeve financiare për blerjen e votave.
Në vend të ndalimit dhe arrestimit në flagrancë të këtyre personave, segmente të policisë të drejtuar nga kryekrimineli Bert Aga, i kane dhënë mbështetje këtij krimi elektoral. Bert Aga është kallzuar penalisht nga Partia Demokratike me 1 shtator si anetar kryesor i grupit të strukturuar kriminal i cili në abuzim të detyrës së shefit të Komisariatit të Peshkopisë ushtron presion ndaj zgjedhësve dhe ofron mbështetje logjistike dhe mbrojtje ekstraligjore për operacionin e shperndarjes së parave në këmbim të votave”, denoncon PD.
Por i akuzuari nga PD, Dionis Ymeraj ka reaguar ndaj akuzave duke thënë se ato janë fallco dhe se opozita kërkon të njollosë zgjedhjet në Dibër.
Sipas Ymerajt, Artan Isaku nuk është punonjës i Tatimeve të Dibrës dhe ka deklaruar se nëse PD nuk tërhiqet nga akuzat, do ta hedhë në gjyq për shpifje.
