Veç ministrit të Energjitikës Damian Gjiknuri që shoqëron gjithnjë kandidatin e PS-së në Dibër, sot e ka pasur radhën ministrja e Mbrojtjes, Mimi Kodheli.
Gjatë takimeve elektorale në zonën e Pllozhanit dhe Sohodollit, Kodheli është treguar e ashpër me ish-kolegun e saj në parlament, Sherefedin Shehu, duke e etiketuar si “dallkauk”.
“Shqipëria, e aq më pak Dibra nuk bëhet duke votuar dallkaukët. Nuk bëhet me fjalë, bëhet me njerëzit që vijnë nga këtu. Bëhet me njerëz që e kanë demonstruar që janë në shërbim dhe dinë të jenë në shërbimin tuaj. Ju konsiderojnë, thonë ah ata të djathtët i kemi në xhep. Gabohen ata që mendojnë kështu! Ju jeni qytetarë që me kokën lart, në datën 11 Shtator të shkoni dhe të votoni duke pasur respekt për votën, aq sa keni respekt dhe dashuri për të ardhmen e fëmijëve tuaj”, tha Kodheli gjatë fjalës së saj.
Më herët në Dibër kanë qenë në mbështetje të Muharem Ramës edhe ministra të tjerë të qeverisë, si dhe zyrtarë të lartë të mazhorancës.
