Misioni i Bashkimit Europian EURALIUS, që asiston drejtësinë shqiptare, mirëpriti sot miratimin nga Kuvendi i Shqipërisë të ligjit të vettingut, i cili i hap rrugën procesit të vlerësimit të gjyqtarëve dhe prokurorëve shqiptarë.
“Parlamenti Shqiptar miratoi me anë të një shumice të kualifikuar ligjin për “Vlerësimin e përkohshëm të gjyqtarëve dhe prokurorëve të Republikës së Shqipërisë” në një seancë të jashtëzakonshme parlamentare. Euralius mirëpret miratimin e këtij legjislacioni shumë të rëndësishëm, në zbatim të ndryshimeve Kushtetuese të miratuara më 22.07.2016”, thuhet në një deklaratë të EURALIUS.
“Me zbatimin e këtij ligji, do të fillojë një proces vlerësimi për gjyqtarët dhe prokurorët, anëtarët e Gjykatës Kushtetuese dhe Gjykatës së Lartë, këshilltarët ligjor pranë gjykatës Kushtetuese dhe gjykatës së Lartë si dhe ndihmësit ligjor pranë gjykatave administrative dhe Prokurorisë së Përgjithshme”, vijon deklarata.
Procesi i vlerësimit do të bazohet në kontrollin e pasurive (pasuritë dhe burimi i tyre), kontrolli i figurës (lidhja më krimin dhe të inkriminuarit), dhe profesionalizmi i gjyqtarëve dhe prokurorëve (aftësitë profesionale). Ky ligj hap rrugën drejt rritjes së besimit të qytetarëve në drejtësi.
Misioni i BE-së EURALIUS dhe ai i SHBA-së OPDAT e kanë asistuar nga afër procesin e reformës në drejtësi.
