Ish-kryeministri Sali Berisha ka reaguar në lidhje me ditën e të zhdukurve në Kosovë duke i kërkuar Organizatës së Kombeve të Bashkuara të ngrejë një komision hetimor. Në një status në facebook, Berisha shkruan se pushtuesi serb krye në Kosovë krimet më të rënda kundër njerëzimit. Kërkesa e tij vjen në një kohë kur dy vendet Shqipëri-Serbi janë afruar më së shumti me njëra-tjetrën ndërkohë që nga qeveria shqiptare nuk ka patur asnjë kërkesë të tillë apo ndonjë deklaratë që flet të vërtetën për atë cfarë Serbia kreu në Kosovë. Madje kryeministri shqiptar do të vizitojë Serbinë, mes të tjerash për të promovuar librin e tij “Kurban” dhe për të çelur një ekspozitë vizatimesh.
Mediat serbe shkruajnë se Edi Rama do të niset nga Beogradi për në Nish më 14 tetor, ku do të mbahet një takim i sipërmarrësve shqiptaro-serbë, do të promovohet projekti i rikonstruksionit të autostradës Nish-Durrës, e ku zyrtarë të Kosovës do të marrin pjesë.
Ndërsa nga ana tjetër kosovarët kërkojnë ende 1666 të zhdukur.
“Ditë kujtese kombëtare për 1666 shqiptare të zhdukur nga pushtuesit barbar serb! Të dashur miq, sot mbarë kombi shqiptar përulet me dhimbje të thellë, respekt dhe nderim të veçantë për 1666 bija dhe bij të tij, qytetarë të Kosovës që u vranë, masakruan dhe u zhdukën nga xhelatët e tyre serb vetëm e vetëm se ata ishin shqiptarë.
Duke shprehur ngushëllimet e mia më të sinqerta familjeve dhe të afërmve të shqiptarëve të zhdukur, i bëj thirrje OKB të krijojë me urgjencë një komision ndërkombëtar për të hetuar krimet e rënda kundër njerëzimit që pushtuesit barbar serb kryen dy vitet e fundit të shekullit që shkoi në Kosove duke vrarë masakruar dhe zhdukur gjurmët e krimeve monstruoze ndaj shqiptarëve në Kosovë!”, shkruan Berisha.
