I ashtuquajturi ‘Z. Brexit’ dhe i njohur për qasjet euroskeptike në politikën evropiane, Nigel Farage, ka mbështetur në mënyrë indirekte kandidatin republikan Donald Trump, duke u shfaqur gjatë një takimi elektoral që miliarderi kontrovers mbajti në shtetin e Missisipit.
-lideri i Partisë UKIP tha se nuk dëshiron që t’i këshillojë votuesit në Shtetet e Bashkuara për të ushtruar të drejtë e tyre demokratike, por nënvizoi se nëse do të ishte një qytetar amerikan, nuk do të votonte për kandidaten demokrate Hillary Clinton, edhe nëse dikush do ta paguante për të bërë një gjë të tillë.
Nigel Farage refuzoi që ta mbështeste në mënyrë të drejtpërdrejtë republikanin pasi sipas tij kjo nuk është një lëvizje korrekte politike.
Ai e krahasoi diçka të tillë me interferencën e Presidentit Obama gjatë referendumit të çështjes Brexit, ku lideri i shtëpisë së bardhë u bëri thirrje qytetarëve për të qëndruar brenda BE-së. Sipas Farage, kjo është një sjellje krejtësisht e gabuar.
Nga ana tjetër, Trump e falënderoi eurospektikun për prezencën e tij në këtë takim elektoral. Miliarderi kontrovers u shpreh se ShBA dhe Britania kanë disa probleme mjaft të ngjashme, ku preferoi që të përmendte sërish çështjen e emigracionit, problemet ekonomike si dhe forcimin e masave të sigurisë.
Më tej, republikani u shpreh se personalisht kishte qenë një mbështetës i fortë për daljen e Britanisë nga Bashkimi Evropian. Ai shtoi se kjo lëvizje i rikthen fuqinë vendimmarrëse parlamentit vendas.
