Një danez dhe një italian do të vendosin drejtësi në ndeshjet e kthimit të skuadrave shqiptare për play-offin e Europa League.
Uefa ka përcaktuar arbitrat që do të gjykojnë ndeshjet e të Enjtes në këtë kompeticion. Në duelin e Elbasan Arenas mes Partizanit dhe Krasnodarit, arbitër kryesor do të jetë danezi Jakob Kehlet ndërsa asistentë të tij Lars Rix dhe Heine Sorensen ndërsa gjyqtar i 4-t Michael Tykgaard. 35-vjecari Jakob Kehlet mban stemën e Fifas që prej vitit 2011, por pavarsisht kësaj ai është një arbitër jo me ndonjë eksperiencë të madhe në arenën ndërkombëtare.
Për Kehlet Partizani-Krasnodar do të jetë ndeshja e dytë që gjykon në kompeticionet e Uefas në këtë sezon pas takimit të turit të 3-të të Championsit mes irlandezëve të Dundalk dhe bjellorusëve të Bate Borisiv. 35-vjecari danez ka gjykuar 3 sfida të fazës së grupeve në edicionin e kaluar të Europa League pikërisht takimet Dinamo Minsk-Rapid Wien, Monaco-Qarabag dhe Paok-Qabala. Në rang kombëtaresh ndeshja më e rëndësishme që ka gjykuar Kehlet është miqësorja e muajit Maj të këtij viti mes Suedisë dhe Sllovenisë.
Danezi është një arbitër që lejon lojën e ashpër dhe rrallëherë e nxjerr kartonin nga xhepi. Por me Partizanin që është pothuajse i eliminuar nga Europa League pas humbjes së thellë që pësoi në ndeshjen e parë ndaj Krasnodarit, vëmendja e të gjithë shqiptarëve mbrëmjen e të Enjtes do të jetë te takimi mes Shkëndijës-Gent, me skuadrën tetovare që do të synojë të përmbysë disfatën 2-1 të ndeshjes së parë për të siguruar kualifikimin historik në fazën e grupeve të Europa League.
Do të jetë 4-she gjyqtarësh nga Italia që do të vendosi drejtësi në këtë sfidë me kryesor Luca Bantin. 42-vjecari nga Livorno është një gjyqtar që gjykon rregullisht sfidat e Serisë A italiane ndërsa mban stemën e Fifas që prej vitit 2009. Falë përvojës së madhe që zotëron në fushën e arbtrimit, 42-vjecarit italian iu besuan disa prej ndeshjeve më të rëndësishme të sezonit të kaluar në Serinë A italiane si Juventus-Roma, Napoli-Milan, derbi i kryeqytetit Lazio-Roma apo edhe Lazio-Inter. Borussia Dortmund- Porto ishte një tjetër ndeshje delikate e vlefshme për fazën me eliminim direkt të Europa League edicionin e shkuar në të cilën Banti vendosi drejtësi.
Në nivel përfaqësuesesh, 42 vjecari gjykoi disa prej sfidave kualifikuese të Europianit, Francë 2016-të. Banti shquhet si një arbitër që në shumicën e rasteve nxjerr shumë kartonë. Asistentë të tij në takimin Shkëndija-Gent do të jenë Alessandro Costanzo dhe Gianluca Vuoto ndërsa arbitër i 4-t, Marco Guida.
