Kompania kanadeze Scaldarsi Motors ka prezantuar limuzinën luksoze Emperor I, e cila për ndërtimin e saj është bazuar në Mercedes-Maybach S600.
Dizajnerët e kësaj kompanie kanadeze pjesën e përparme e kanë ndryshuar në tërësi, ku tani ajo karakterizohet me maskën e përparme të theksuar dhe dritat LED, por duhet përmendur edhe rrotat e reja, difuzerin e pasmë, spoiler mbi bagazh si dhe me disa elemente të praruara me ari 24-karat.
Ndërkaq, sa i përket interierit, blerësit e pasur kanë mundësi që të zgjedhin 24 lloje të ngjyrave të lëkurës dhe 24 lloje të ngjyrave të lëkurës së “kafshëve ekzotike” , transmeton Koha.net. Kuptohet që interieri përbëhet edhe nga disa elemente nga druri, Alcantara si dhe me teknologji të avancuar.
Gjithashtu, duhet theksuar se për eksterierin e Emperor I ofrohen 16 lloje të ngjyrave. Emperor I vjen me motor 6.3-litër V12 Twin-Turbo, i huazuar nga Brabus Rocket 900, me kapacitet prej 900 kuajfuqi, gjë që është e mjaftueshme që shpejtësinë nga 0 deri në 100 kilometra në orë ta arrijë për vetëm 3,7 sekonda.
Scaldarsi Motors është duke planifikuar serinë e Emperor I me vetëm 10 njësi, me çmim prej 1.5 milion dollarë për një njësi.
Po ashtu, Scaldarsi Motors njofton se Emperor I është modeli i parë i koleksionit të ardhshëm të kësaj kompanie, “Emperor”, i cili do të përbëhet nga 11 modele (secili prej tyre do të ofrohet në seri të kufizuar prej 10 njësive). Në mesin e tyre do të jetë edhe Emperor II (i bazuar në Mercedes-AMG S 65 Coupe), Emperor III (i bazuar në Bentley Bentayga), Emperor IV (i bazuar në Mercedes-AMG G 65), si dhe Emperor V (i bazuar në Bugatti Chiron).
