Akuza false dhe denigruese i ka konsideruar Ministria e Brendshme akuzat e Partisë Demokratike për përfshirje të drejtuesve të policisë në trafik të lëndëve narkotike.
Në një reagim për mediat, ky dikaster thotë se, deklarata të tilla janë fletë-rrufe të turpshme dhe që kanë për qëllim që të përbaltin punën e policisë së shtetit.
Ajo shton se lufta ndaj kultivimit të bimëve narkotike ka qenë dhe është prioritet i policisë, ndonëse Partia Demokratike vazhdon ta luftojë policinë.
Ja deklaratë për Shtyp e Ministrisë së Brendshme
Në mënyrë të përsëritur dhe të përditshme Partia Demokratike publikon nga salla e saj e konferencave të shtypit një fletë-rrufe akuzash false dhe denigruese, ndaj Policisë së Shtetit e drejtuesve të saj.
Me shume keqardhje vëmë re se këto fletë-rrufe të turpshme nuk kanë asnjë qëllim tjetër përveç përbaltjes së Policisë së Shtetit dhe gjithçka përfshihet në to nuk ka të bëjë me realitetin e fakteve, po vjen nga kazani i thashethemeve të Liderit Dixhital të Partisë Demokratike.
Ministria e Brendshme e vlerëson përfundimisht të kotë, vazhdimin e përgënjeshtrimeve për serine e shpifjeve dhe të marrëzive që publikon çdo ditë selia e opozitës. Lufta kundër kultivimit dhe trafikimit të kanabisit ka qenë dhe mbetet prioritet i Policisë së Shtetit, e cila në bashkëpunim me partneret ndërkombëtarë, po regjistron edhe këtë vit arritje të rëndësishme në këtë luftë.
Partia Demokratike fatkeqësisht vazhdon të luftoje Policinë e Shtetit, në një përpjekje të marrë dhe të dështuar, shëmbëlltyre e marrëzisë dhe dështimit të Liderit te saj Dixhital.
