Jerome Boateng është më i votuari nga tifozët gjermanë për të marrë shiritin e kapitenit të kombëtares kampione bote. Duket e pabesueshme? Mbase, por ky është rezultati i sondazheve në “Bild” dhe “Sport1”.
Një nga argumentet që e nderon qendërmbrojtësin e Bayernit në këtë çështje është pikërisht vetofrimi i tij për të marrë përgjegjësi. Këtë Boateng e ka shprehur prej kohësh, por – me largimin e Bastian Schweinsteigerit nga “pancerat” – ish-lojtari i Hertha Berlinit shfrytëzoi një intervistë në “Bild” për të rishfaqur veten si një alternativë.
“Për mua është një nder të jem kapiten i kombëtares. Sigurisht që do të isha i përgatitur. Ky është një pozicion i rëndësishëm. Përfaqëson vendin tënd, ke përgjegjësi”, – tha Boateng. Kandidatët, faktikisht, nuk mungojnë. Bashkë me të, edhe Manuel Neuer, Sami Khedira, Mats Hummels dhe Toni Kroos kanë shanse për të pasuar 32-vjeçarin Schweinsteiger.
“Skuadra jonë kombëtare ka disa lojtarë të fortë për të marrë shiritin. Një shef të vetëm nuk kemi. Jogi Löw padyshim që do të marrë vendimin e duhur se kush duhet të jetë kapiteni i ardhshëm”, – shtoi shtatlarti. Boateng aktualisht është i dëmtuar (në Evropian, me Italinë), por dje mbrojtësi ndërpreu pushimet për t’iu bashkuar skuadrës.
“Jam relativisht mirë. Kam shpresë se do të jem shpejt gati për lojë. Ancelotti? Po, kam folur nja dy herë me trajnerin dhe ai më ka udhëzuar ta marr gjithçka me qetësi”, – përfundoi njeriu i cili mund të bëhet kapiteni i parë me ngjyrë në historinë e kombëtares gjermane.
