Policia e Shtetit ka reaguar pas publikimit të videos nga Partia Demokratike ku shfaqej gjithë zona e Lumit të Vlorës e mbjellë me kanabis. Policia e Shtetit thotë se do të ndëshkojë efektivët që kanë nxjerrë videon e filmuar nga vetë policia.
Më tej Policia e Shtetit deklaron se kjo është çështje nën hetim dhe se ka patur aksion për asgjësimin e bimëve.
“Policia e Shtetit falënderon subjektin politik që me deklaratat dhe pamjet e shfaqura sot u bën jehonë aksioneve të Policisë së Shtetit dhe luftës së pandërprerë kundër kultivimit të narkotikëve. Pamjet që u transmetuan sot nga PD janë filmuar nga vetë Policia e Shtetit si pjesë e punës intensive për dosjen hetimore përkatëse. Bazuar mbi këto hetime (përfshirë edhe pamjet) u zhvillua aksioni për asgjësimin e këtyre bimëve narkotike dhe vënien para përgjegjësisë ligjore të autorëve të shkeljes së ligjit.Ndërkohë, Policia e Shtetit bën me dije se kanë nisur verifikimet dhe do të vihen përpara përgjegjësisë ligjore e penale të gjithë punonjësit e policisë, të cilët kanë nxjerrë sekretin hetimor, duke ekspozuar detaje të një dosje në hetim”, deklaron policia.
