Kreu i Komisionit të Reformës së Drejtësi, Fatmir Xhafa ka dalë para media duke u shprehur i indinjuar nga qëndrimi i Partisë Demokratike lidhur me miratimin e 7 ligjeve të reformës në drejtësi.
Pas daljes nga mbledhja e Komisionit të Reformës në Drejtësi, Xhafa tha se opozita po bllokon kalin e këtyre ligjeve. Sipas tij, nëse opozita do të ndiqte mbledhjet e komisionit në datat 21 deri në 28 korrik do ta kalonin paketën por tani procesi i reformës do të vështirësohet.
“Është një nga shtatë ligjet që bën të mundur ngritjen e institucioneve të reja dhe fillimin e realizimit të reformës në drejtësi. Është një ligj shumë i rëndësishëm. Pa nisur procesi i vetingut s’mund të nisë reforma në drejtësi. Ligji ka pasur një proces shqyrtimi. Me dorëzimin e projektit kushtetues nga komisioni i posaçëm në Kuvend për tu futur për shqyrtim, u futën në kalendar edhe shtatë ligjet, të cilat ishin programuar për në 28 korrik”, tha Xhafaj.
Sipas tij “Komisioni i posaçëm ka zhvilluar disa mbledhje dhe ky projektligj është shqyrtuar. Është gënjeshtër e atyre që thonë se s’kanë pasur kohë për ta njohur ligjin. Në katër korrik ata që bojkotuan procesin kanë marrë dhe janë njoftuar me projektligjin. Ajo që është dërguar dje është reflektimi i ndryshimeve të fundit kushtetuese. Projektligji është gati për të kaluar në seancë plenare”.
Më tej Xhafa tha se ndihet I shqetësuar për deklaratat publike që po bën PD-ja, pasi sipas tij ajo duhet të vinte në komision për të diskutuar dhe jo në media.
“Jam i shqetësuar nga deklarimet publike të PD-së që e rëndëojnë klimën politike pasi duhet të vinin të bisedonin për këtë proces. Zgjidhja është ulja në komision e të diskutojmë se si ta vazhdojmë këtë process”.
