“Sulmi i Mynihut nuk konfrimon vizionin e errët të botës dhe Amerikës të propaganduar nga Donald Trump”, deklaroi sot presidenti amerikan Barack Obama duke iu drejtuar manjatit miliarder të pasurive të paluajtshme lidhur me diskutimin në konventën e zhvilluar në Klivlend.
“Terrorizmi është një kërcënim real dhe mënyra më e mirë për ta parandaluar është të mos e përçajmë vendin, të mos frikësohemi dhe të mos sakrifikojmë vlerat tona”, deklaroi Obama për CBS-në.
“Nëse do të fillonim të ndiqnim propozimet që kam dëgjuar nga zoti Trump apo nga disa prej surrogatove të tij si zoti Gingrich (ish-kryetari republikan i Dhomës së Përfaqësuesve) dhe nëse do të mbështesnim hipotezën e testeve religjioze për njerëzit që hyjnë në Amerikë apo të kontrollonim myslimanët ndryshe nga sa veprojmë për të tjerët, atëhere ne do të tradhtonim ato vlera që e bëjnë Amerikën të jashtëzakonshme”, theksoi Obama.
Të paktën nëntë persona u vranë dje gjatë një sulmi me armë zjarri nga një adoleshent 18-vjeçar gjermano-iranian në Mynih motivet e të cilit janë plotësisht të panjohura.
