Xherdan Shaqiri ka bërë të ditur se ai do të qëndrojë te Stoke sezonin e ardhshëm, duke larguar zërat që flasin për transferim të tijin te Borussia Dortmund. Lojtari zviceran ka luajtur një sezon në Premier League, por është përfolur për një kthim në Bundesliga për një shumë të madhe parash.
Dortmund është në kërkim të një zëvendësuesi të Henrikh Mkhitaryan, i cili është larguar te Manchester United, dhe besohet se nën kampionët e Gjermanisë kanë vënë në shënjestër pikërisht ish-lojtarin e kampionëve të Gjermanisë në fuqi, Bayern Munich. Megjithatë, ka qenë vetë lojtari që ka sqaruar gjithçka, në një intervistë për “Blick”. “Askush nuk më ka thënë mua (për interesimin e Dortmund), kështu që për momentin këto janë thjesht fjalë. Unë jam me pushime tani.
Një transferim në Bundesliga nuk është pjesë e planeve për momentin. Më 24 korrik do të grumbullohem me Stoke-n dhe pres me padurim fillimin e Premier League. Kam objektiva për të arritur me këtë skuadër”, ka thënë ish-lojtari i Inter-it, i cili do të ketë gëzuar tifozët e bardhekuqve. Një tjetër lajm i mirë për mbështetësit e ekipit anglez ka qenë edhe marrëveshja pothuajse e arritur me talentin egjiptian Ramadan Sobhi. Kjo është bërë e ditur nga drejtori ekzekutiv i klubit Tony Scholes. “Ai konsiderohet një talent i veçantë ën Egjipt.
Fakti që prej 12 muajsh është pjesë e ekipit kombëtare dhe është vetëm 19 vjeç, tregon shumë për cilësitë e tij. Është shumë i talentuar, por nuk duhet të harrojmë moshën e re dhe se po vjen nga një vend tjetër, me një kulturë të ndryshme. I duhet dhënë koha për t’u përshtatur, por kemi të bëjmë me një lojtar që premton shumë për të ardhmen dhe ne jemi entuziastë. Shpresojmë që në orët në vazhdim operacioni të mbyllet përfundimisht”, ka thënë Scholes.