Të rinjtë janë organizuar në një takim me kryetarin e Komisionit të Posaçëm për Reformën në Drejtësi Z. Fatmir Xhafaj, si dhe me dy deputetë të tjerë të Kuvendit të Shqipërisë Znj. Vasilika Hysi dhe Z. Pandeli Majko, për të diskutuar për reformën në drejtësi. Ky takim ka patur si qëllim informimin e të rinjve për reformën në lidhje me të ardhmen e tyre.
Rrjeti Kombëtar për të Rinjtë në Shqipëri (ANYN) dhe Lidershipi i të Rinjve të Tiranës (LRT), në bashkëpunim me Qendrën për Mbrojtjen e të Drejtave të Fëmijëve / CRCA në Shqipëri ngritën disa pyetje për t`u informuar më tepër rreth procesit në të cilin ka kaluar hartimi i Reformës në Drejtësi.
Kryetari i komisionit për Reformën në Drejtësi Fatmir Xhafaj tha se në 25 vite me rradhë shqiptarët nuk kanë mundur të shijojnë thelbin e shtetit dhe drejtësinë. “Në vite ky pushtet është dobësuar gjithnjë e më shumë duke u shndërruar sot në më të korruptuarin, të varur e të komanduar nga partitë politike. Sistemi sot nuk është i aftë dhe kjo mungesë profesionalizmi nuk i jep integritet dhe forcë për t’u ndeshur me krimin e organizuar dhe korrupsionin. Si rrjedhojë e kësaj, këtij sistemi duhet t’i japim pavarësi!”, u shpreh Xhafa.
Në fund të fjalës së tij, Z. Xhafa u shpreh se shoqëria dhe në veçanti të rinjtë duhet të jenë sa më të informuar rreth reformës në drejtësi, si dhe të luajnë një rol aktiv në miratimin e saj.
