Kreu i OSHEE-së, Ardian Çela, ka reaguar pas përmendjes së emrit të tij në letrën e hapur të ish-deputetit socialist, Vladimir Kosta, të publikuar një ditë më parë. Padashur Çela zbulon aferat me tendera që bëjnë institucionet e drejtuara nga njerëzit e maxhorancës.
Ai thotë se Kosta i ka kërkuar tendera në rrugë të paligjshme, ndaj dhe e akuzon. Por kur deputeti socialist i ka kërkuar tendera në mënyrë të paligjshme përse nuk është denoncuar nga kreu i OSHEE-së?
“Shpreh keqardhje të thellë për prononcimin e deputetit Vladimir Kosta, por nuk jam i keqardhur që nuk ia kam plotësuar kërkesat e tij absurde për të fituar në rrugë të paligjshme tenderë të shpallur nga OSHEE. Fatkeqësisht nuk më vjen e papritur kjo shfaqje vulgariteti vetëdiskreditues që flet vetë për nivelin e Vladimir Kostës”, thotë Çela.
Ai shton se ‘sulmin e tij në vigjilje të finalizimit të Reformës në Drejtësi e marr si kompliment për kompaninë dhe për drejtimin tim me ligjshmëri dhe transparencë’.
“Reforma në Drejtësi ende pa u miratuar po tregon se çfarë vlere të madhe ka për të ndarë njerëzit që duan shtet, drejtësi, rregulla nga ata që duan të vazhdojnë në rrugën e vjetër të përfitimeve të paligjshme”, thotë Çela në reagimin e tij.
