Ndërmarrjet në Shqipëri kanë një poërdorim të njëjtë të internetit me ato të rajonit. Sipas Institutit të statistikave gjysma e bizneseve shqiptare kanë një faqe interneti për prezantimin e aktivitetit të tyre, ndërsa 95 për qind e bizneseve, që kanë mbi 10 të punësuar, përdorin kompjuter për qëllime pune.
Ky rezultat i anketës të përdorimit të teknologjisë nga biznesi u prezantua ditën e djeshme nga INSTAT. Drejtoresha e Statistikave, Mirela Muça, tha se përdorimi i internetit nga ndërmarrjet në Shqipëri është në nivele të njëjta si në vendet e rajonit, por më i ulët se ato të Bashkimit Europian. “Përqindja e përdorimit të kompjuterit nga ndërmarrjet në Shqipëri është e njëjtë me vende të rajonit, si Maqedonia, në nivelin 95 për qind, por më e ulët krahasuar me mesataren e vendeve anëtare të BEsë, ku është 98 për qind. Në vitin 2015, ndërmarrjet që kanë pasur faqe ueb janë 48,8 për qind, ndërsa media sociale është përdorur nga 37.4 për qind e ndërmarrjeve. Ndërmarrjet e mëdha, me mbi 250 të punësuar, janë ato të cilat kanë përgjithësisht faqe uebi apo kanë përdorur median sociale”, u shpreh Muça. Nga rezultatet e anketës vlerësohet se përdorimi më i ulët i kompjuterit konstatohet në sektorin e ndërtimit dhe industrinë përpunuese.
“Lidhur me aktivitetin ekonomik, përqindja më e ulët e punonjësve që përdorin kompjuter vërehet në aktivitetin e industrisë përpunuese në 7.4 për qind dhe në aktivitetin e ndërtimit në 19 për qind. Kompjuterët janë përdorur në një masë më të madhe nga punonjësit e ndërmarrjeve që kanë aktivitet në fushën e informacionit dhe komunikacionit dhe aktivitetet profesionale, shkencore dhe teknike”, u shpreh Muça.
Sipas rezultateve të anketës, në 2015n kanë përdorur kompjuter për qëllime pune 95 për qind e ndërmarrjeve me mbi 10 të punë suar. Ndërsa të gjitha ndërmarrjet e mëdha, me mbi 250 të punë suar, rezultojnë të kenë përdorur kompjuter. Punonjësit që kanë përdorur kompjuter për qëllime pune përbëjnë 24.4 për qind të të punësuarve në biznese. Përqindja e ndërmarrjeve, të cilat përdorën internetin për të kontaktuar me institucionet publike, gjatë vitit 2015, ishte 95.2 për qind.
Nga të dhënat e anketës konstatohet se në vitin 2015 ndërmarrjet që kanë shitur apo kanë blerë produktet dhe shërbimet e tyre nëpërmjet faqes së internetit janë 10.4 për qind. Shitjet dhe blerjet më të larta online bëhen nga ndërmarrjet që ushtrojnë aktivitet në fushën e informacionit dhe komunikacionit, duke zënë 26.9 për qind; sektori i transportit aktivitetin online e ka 23.9 për qind; aktivitetet profesionale, shkencore dhe teknike kanë shitur dhe kanë blerë online 22.3 për qind të produkteve të tyre. Ndërsa 3.6 për qind e ndërmarrjeve ndërtuese dhe 6.5 për qind e ndërmarrjeve përpunuese kanë shitur ose blerë online.37
