Gjatë fjalimit të tij në festën e 25-vjetorit të Partisë Socialiste, Kryeministri Edi Rama u shpreh se në këto 3 vite në krye të Qeverisë dhe gjatë viteve të tjera në Partinë Socialiste, ka mësuar shumë gjëra për problemet e qytetarëve.
“Në 10 vjet drejtim i kësaj partie të madhe politike kam mësuar shumë. Kam pasur mundësinë të njoh mirë dhe të kuptoj më thellë Shqipërinë. Kam pasur po ashtu fatin të njoh shumë njerëz, të dëgjoj shumë dhe të mësoj shumë. PS është një shkollë e ngritur se askush s’mund të ketë të drejtë për çdo gjë dhe gjithmonë. Kam mësuar se Kryeministër nuk të bën karrigia.
Këtu kam mësuar se ndryshimet e rëndësishme bëhen kur jemi të sigurtë. Gabojmë përgjithësisht kur nuk ja dalim. Njerëzit e kuptuan në 2013 se ndryshimi vinte përmes nesh.
Cila forcë tjetër politike ka qenë më konsekuente në mbrojtjen e interesit kombëtar. Asnjë forcë tjetër politike nuk e ka pasur konsekuencën e kësaj force politike.
Nuk i vë faj askujt se mund të mendojnë se unë nuk kam bërë asgjë për të apo komunitetin që e rrethon. Por unë nuk e harroj kurrë se kujt i shërbej. Ka ca njerëz që smund ti kënaqësh kurrë. Unë nuk e di nëse kam mësuar sa duhet dhe si duhet. Por di që kam mësuar shumë.
Mjafton të jemi plotësisht të vendosur t’i bëjmë detyrat që na imponon e ardhmja dhe jo duke dëgjuar njëri-tjetrin, por duke udhëhequr. Kush mendon se mund të flasë në emër të tyre dhe të devijojë rrugën e aspiratave të tyre, e ka thjesht çështje kohe të marrë përgjigjen e merituar nga njerëzit. Faleminderit të gjithë themeluesve të kësaj partie. Për ata që e kanë themeluar PS, ka pak rëndësi nëse janë ose jo prezent”, tha Kryeministri Rama.
