Temperaturat e larta të stinës së verës ndikojnë në përkeqesimin e shëndetit për pacientët e sëmundjeve mendore. Përgjegjësja e sektorit të sëmundjeve mendore në ISHP, Jonida Haxhiu, e argumenton këtë me çrregullimin e niveleve të neurotransmetuesve që stimulojnë agravim të gjendjes fizike dhe psikologjike.
“Vapa ose temperaturat e larta shkaktojnë një përkeqësim të problemeve të shëndetit mendor. Statikisht është vërtetuar që të gjitha problemet e shëndetit mendor, të gjithë personat që janë të diagnostikuar me probleme të shëndetit mendor kanë një përkeqësim në motin e nxehtë. Ekziston ajo që quhet teoria e dopaminës, pra nga çrregullimet e niveleve të neurotransmetuesve mendohet që efekti fizik që ka kjo gjë, efekti fiziologjik ndikon në pasojat psikologjike.” – shprehet Haxhiu.
Në këtë stinë përjetim të shtuar të stresit, rëndim të gjendjes që vuajnë nga ankthi dhe depresioni.
“Stresi, depresioni, psikoza, problemet me substancat. Është vënë re rritje e suicideve.” – shprehet Haxhiu.
Familjarët duhet të kenë kujdes, në rast se vetë pacientët janë të pamundur, për të zgjedhur për ta vende të freskëta, dhe të shmangin konsumimin e pijeve që kanë sheqer të shtuar.
“Ambjente të freskëta, sa më shumë të ajrosura, konsumimi i pijeve në mënyrë që të freskohet trupi. Duke e përmendur këtu që sheqeri i shtuar apo pijet e gazuara nga ana tjetër përveç dëmeve fizike shkaktojnë dhe stres për organizimin, gjë që mund të reflektohet dhe tek këta persona me probleme të shëndetit mendor.” – shprehet Haxhiu.
Shqipëria nuk ka studime të mirëfillta për numrin e pacientëve të prekur nga këto sëmundje, por referuar të dhënave në sistemin shëndetësor parësor për Tiranën në një vit kryhen mesatarisht 15.000 vizita, persona që kërkojnë ndihmën e mjekëve psikatër për shkak të çrregullimeve dhe probleme të shëndeti mendor./Ora News
