Imazhi i Edi Ramës në Angli nuk është aq rozë, sa ç’dukej në Samitin e Parisit, ku kryeministri shqiptar u shfaq i shpenguar mes Angela Merkel dhe Francois Holande.
The Guardian shkruan sot për skandalin e 80 mijë dollarëve të paguara në SHBA për një fotografi me Barak Obamën. Sipas të përditshmes angleze, opozita shqiptare e akuzon Ramën se ka financuar në mënyrë të paligjshme fushatën e rizgjedhjes së Obamës si president i Shteteve të Bashkuara të Amerikës, në këmbim të një fotografie të përbashkët në vitin 2012. Demokratët e kanë dërguar çështjen në zyrën e Prokurorit të Përgjithshëm, me arsyetimin se pagesa shkel ligjet shqiptare dhe ato amerikane.
“Mbetet e paqartë nëse prokurorët do të vendosin të hetojnë për këtë çështje” shkruan The Guardian.
Në shkrim përmendet edhe Bilal Shehu që që u pranoi në Gjykatën e Nju Xhersit, se kishte financuar në mënyrë të paligjshme fushatën e Obamës. Rama ka mohuar të ketë marrë pjesë në ndonjë nga pritjet elektorale të Obamës, apo të ketë paguar biletat në eventin e San Fransiskos.
Sipas dokumentave të çështjes Shehu në SHBA, e hetuar nga FBI, ai i mori paratë nga një burim i jashtëm, i dhuroi në fondin e fushatës pa treguar origjinën e vërtetë të tyre, me qëllim që një qytetar i huaj të merrte pjesë në event. Emri i Ramës nuk u përmend në këtë çështje.
Dokumentat thonë se “Shtetasit të huaj” iu mohua pjesëmarrja në event, por iu lejua një fotografi me presidentin Barak Obama. The Guardian vënë në dukje se asnjë nga ekipi i mbledhjes së fondeve të Obamës nuk u akuza për shkelje të ligjit, përkundrazi ata janë treguar të gatshëm të bashkëpunojnë. Vendimi për Bilal Shehun do të jepet në 5 Tetor. Dënimi maksimal është 5 vjet burg dhe një gjobë prej 250 mijë dollarë. /Lapsi/
