Erozioni detar gjatë viteve të fundit ka bërë që deti t’i afrohet linjës elektrike, duke ngushtuar ndjeshëm sipërfaqen e plazhit.
Kështu, pushuesit që do të zgjedhin bregdetin e Kunes në Shëngjin, duhet të marrin parasysh edhe rrezikun që u kanoset nga përcjellësit e energjisë elektrike. Linja e tensionit 10 mijë volt kalon sipër kokave të pushuesve. Linja elektrike mbi kokat e pushuesve në Kune të Lezhës. Kjo ka detyruar bizneset që t’i vendosin shezlongët poshtë linjës elektrike, pasi nuk kanë gjetur zgjidhje tjetër. Pushuesit në këtë zonë ndihen mjaft të frikësuar kur vënë re se mbi kokat e tyre kalon rryma elektrike. Ata kërkojnë zhvendosjen e shtyllave nga zona e plazhit, pasi në rast të kundërt rreziku për ndonjë tragjedi të mundshme është prezent.
“Unë jam një frekuentues i rregullt i plazhit të Kunes dhe këtu është një zonë shumë e mirë për të pushuar. Erozioni këtu ka marrë përmasa të frikshme, duke zvogëluar ndjeshëm sipërfaqen e plazhit e për rrjedhojë i është afruar linjës elektrike. Është shumë e frikshme kur shoh që mbi kokat tona janë telat e energjisë me një kapacitet prej 10 mijë voltësh. Jeta jonë këtu është në rrezik dhe kërkoj që të merren masa të menjëhershme për të zhvendosur linjën elektrike, para se të ndodhë ndonjë tragjedi e mundshme. Kjo situatë është e papranueshme dhe ndërhyrja duhet të jetë sa më e shpejtë”,
shprehet një pushues.
