Burime konfidenciale nga policia flasin për një shumë të madhe parash të grabitura pasditen e sotme në Rinas. Sipas këtyre burimeve mendohet që shuma e grabitur është rreth 3 milion euro.
Me sa duket autorët kanë qenë në dijeni të transportit të kësaj shume të madhe parash. Kanë qenë 3 persona të armatosur dhe të maskuar që kanë hyrë në pistën e aeroportit në Rinas dhe kanë grabitur paratë që do niseshin jashtë shtetit.
Nga ana tjetër policia shfajësohet duke thënë se ruhej nga policia private. “Rrethimi i jashtëm sigurohet nga sherbimi i sigurise se kompanise private qe menaxhon aeroportin”, shkruhet në komunikatë.
Njoftimi i plotë i Policisë së Shtetit
“Policia e Tiranës është njoftuar se rreth orës 14:45 në sheshin e brendshëm të fluturimeve të aeroportit “Nënë Tereza” ka ndodhur një grabitje me armë. Menjëherë janë angazhuar shërbimet policore në aeroport dhe forca shtesë nga Drejtoria Vendore e Kufirit.
Nisur nga informacioni paraprak, raportohet se është grabitur nje sasi monetare, qe po transferoheshin me mjetet e SHPSF “Nazeri 2000”, nga terminali drejt avionit.
Dyshohet se autorë të grabitjes janë të paktën 3 persona. Ata hynë në rrethimin e brendshëm të aeroportit, pasi prenë menteshat e portës së jashtme që ndodhet nga krahu i rrugës Rinas – Fushë Krujë.
Rrethimi i jashtëm sigurohet nga sherbimi i sigurise se kompanise private qe menaxhon aeroportin.
Pasi kanë marrë sasinë e valutës, autorët janë larguar me shpejtësi. Gjatë ndjekjes së autorëve policia ka gjetur të djegur mjetin tip “Benz”, që dyshohet se u përdor nga autorët.
Policia e Shtetit po vijon ndjekjen e tyre, me forca të shumta dhe nga ajri me helikopter.
Forcat RENEA po ushtrojnë kontrolle në akset rrugore dhe zonat ku dyshohet se strehohen autorët. Vazhdojnë intensivisht kërkimet dhe hetimet për zbulimin dhe kapjen e autorëve dhe zbardhjen e plote të ngjarjes”.
Lajmet e tjera për grabitjen ne Rinas
