Tre persona të armatosur dhe të maskuar kanë grabitur me armë në aeroportin Nënë Tereza.
Burime nga policia paraprakisht thotë se shuma e grabitur është 200 mijë euro, por mund të jetë edhe më e madhe.
Burime policore thanë se, makina ka thyer postbllokun e policisë që është vendosur në aeroportin e Rinasit, ku në fakt që prej ditës së djeshme janë shtuar edhe masat e sigurisë në këtë objekt të rëndësisë së veçantë.
Më pas makina me personat e armatosur dhe të maskuar, kanë shkuar tek avioni dhe kanë rrëmbyer çantat me para. Pas kësaj mjeti është drejtuar për në fund të zonës së pistës së avionëve duke çarë rrethimin dhe duke ikur për në drejtim të Fushë Krujës.
Pas kësaj, grabitësit e kanë braktisur makinën dhe i kanë vënë flakën mjetit, duke humbur gjurmët.
Ndërkaq policia bën të ditur se është gjetur makina e grabitësve, pranë urës së Tapizës.
Kujtojmë se ditën e djeshme, Policia e Rinasit kishte rritur sigurinë në aeroport për shkak të sulmeve terroriste që ndodhën në aeroportin e Stambollit.
Pas sulmit terrorist në aeroportin e Stambollit, Policia e Shtetit ka kaluar në gatishmëri të përforcuar.
Prej mbrëmjes së të martës në aeroportin “Nënë Tereza” janë shtuar masat e sigurisë, të cilat do të vijojnë për një periudhë të papërcaktuar.
Po ashtu të gjithë udhëtimet drejt Stambollit janë anuluar, ndërsa një numër i madh qytetarësh janë detyruar të kthehen pas, për shkak se ky aeroport përdoret shumë si tranzit edhe për destinacione të tjera.
“Ka një rritje të shtuar të masave të sigurisë. Patrullime të shtuara me qen antieksploziv. Masat e padukshme janë ato që konsistojnë në skanderimin më të mirë të bagazheve dhe pasagjerëve. Këto masa do të vazhdojnë deri në një urdhër të dytë. Janë anuluar fluturimet në drejtim të Stambollit dhe anasjelltas”, u shpreh Ermal Milori, shef i policisë kufitare, Rinas.
Masa shtesë janë marrë edhe në pikat e tjera të kalimit kufitar, veçanërisht në porte ku do të ketë një prani të shtuar të uniformave blu.
Lajmet e tjera për grabitjen ne Rinas
