Nga BoldNews.al
Ka mjaftuar një deklaratë në rrjetet sociale të një deputeti të Kuvendit të Shqipërisë që ai të përjashtohet nga grupi parlamentar i partisë së tij. (LSI) Zoti Përparim Spahiu ndoshta ende nuk kishte shijuar like dhe mbështetjen popullore ku në emër të patriotizmit dhe sovranitetit ai u shfaq kundër komisioneve ndërkombëtare për reformën në drejtësi. Menjëherë jashtë radhe si në ato pleniumet e famshme të Partisë së Punës, Lëvizja Socialistë për Integrim e përjashtoi për një qëndrim kundër vijës së partisë.
Ndërkohë kujtojmë se qëndrimi I ligjvënësit Dibran u bë në rrjetet sociale dhe jo në aulën e Kuvendit të Shqipërisë. Për ta bërë edhe më komike situatën ( në fakt edhe jo aq komike se duket tragjike nga mënyra se si duan të na hedhin hi syve), mendoi vetë deputeti Spahiu I cili vendimit institucional të mbajtur nga Petrit Vasili iu përgjigj se vota e tij “është dhe do të jetë për LSI”. Kjo deklaratë e tij i ngjan atyre mërmërimave të Kadri Hazbiut se “partia ime po më dënon”, te të më dënojë.
E gjitha kjo duket një farsë e pastër politike e kryesocialistit të integruar Ilir Meta. Kambanat e para të një politike thuaj shumë por asgjë konkrete lindën kur Ilir Meta nxirrte Petrit Vasilin të vendoste kurora me lule në bulevard për 21 janarin e 2011. Pasi kaloi këtë provë të vështirë Meta filloi ta përdorte Vasilin për çdo gjë tjetër kur donte të mos thoshte asgjë. Akuzave të ndërkombëtarëve dhe disa analistëve vendas se ishte kundër reformës në drejtësi, Meta iu përgjigj me një akrobaci duke takuar edhe Ramën edhe Bashën duke dal publikisht duke mbështetur një gjë që tashmë duket shumë qartë që ai nuk e do. Paskëtaj ai njoftoi publikisht se kalorësi i reformës në drejtësi do të ishte Petrit Vasili.
Përjashtimi nga partia i një shoku të vjetër të klasës është në fakt një taktikë e Metës për të treguar zellin e tij pro reformës. Servilizmi me të cilin iu përgjigj pastaj ligjvënësi “ Çdo Partia bën populli”, vetëm sa e nxjerr cullak kreun e LSI-së dhe të vetët. Në fund të fundit duhet pak më shumë fantazi. Por me siguri pavarësisht përjashtimit Përparim Spahiu do të jetë sërish kandidat dhe deputet i kësaj forcë politike edhe në legjislaturën e radhës në pritje për përjashtimin e radhës nga grupi parlamentar. E vetmja gjë e paqartë në këtë mes është fakti se kujt po i hedh hi syve Ilir Meta, votuesve shqiptarë, ndërkombëtarëve apo të dyja palëve bashkë?!
