Dy deputetët Mimoza Hafizi e Ben Blushi kanë zyrtarizuar sot nismën për ndryshimet kushtetuese, të cilës i janë bashkuar edhe 8 deputetë të spektrit të gjerë.
Ka qenë vetë deputetja Hafizi që e ka bërë të ditur në facebook, ku shkruan se në emrin e një grupi deputetësh, shpall nismën për dy ndryshime të rëndësishme në Kushtetutën e vendit, përmes projektligjit bashkëlidhur, që e ka publikuar në profilin e saj. Zgjedhja e presidentit është një nga pikat kyçe.
“Me amendamentin e parë kushtetues, ne kërkojmë që Presidentin e Republikës t’ia japim popullit”. – shkruan Hafizi, ndërsa shton se një President i zgjedhur nga populli, dhe jo nga Kuvendi, do të jetë figurë e pavarur nga politika e ditës dhe përfaqësues i unitetit të popullit në ushtrimin e detyrave të tij të rëndësishme kushtetuese.
Në vijim të postimit të saj, Hafizi saktëson se me këtë amendament nuk kërkohet ndryshimi i kompetencave të Presidentit, por vetëm ndryshimin e mënyrës së zgjedhjes së tij.
Ndërkohë në amendamentin e dytë kushtetues, kërkohet që popullit t’i bëhet e mundur të ndryshojë Kushtetutën e vendit. Hafizi shkruan se me Kushtetutën aktuale, këtë të drejtë populli e merr vetëm nëse bëhen bashkë 94 deputetë, ose 2/3 e parlamentit.
“Por 94 deputetë është e vështirë të bien dakord. Edhe kur bien dakord, preferojnë ta ndryshojnë kushtetutën vetë, pa pyetur popullin, siç ka ndodhur në vitin 2008. Ne kërkojmë që ky numër të ulet në 2/5, pra në 56 deputetë”, vijon me tej deputetja socialiste.
Duke u ndalur në debatin për reformën në drejtësi, Hafizi shkruan se populli shqiptar e ka të pamundur të marrë pjesë në këtë proces, ndaj edhe me ndryshimin e propozuar popullit i lind e drejta që të vendosë vetë për reformën në drejtësi dhe për reforma të tjera të rëndësishme.
Në përfundim Hafizi thotë se amendamentet janë përgatitur se bashku mes saj, Arta Daden dhe Ben Blushin, në diskutim me një grup deputetësh të spektrit të gjerë të parlamentit, ndër të cilët Agron Duka, Dashamir Shehi, Eduard Selami, Luljeta Arapi Nard Ndoka, Tahir Muhedini, Vangjel Dule. Hafizi vlerëson se këto ndryshime kushtetuese janë të domosdoshme për jetën demokratike të vendit.
Ja çfarë shkruan Hafizi:
NISMA PER NDRYSHIME KUSHTETUESE
Kam kënaqësinë që në emrin e një grupi deputetësh, të shpall nismën për dy ndryshime të rëndësishme në Kushtetutën e vendit, përmes projektligjit bashkëlidhur.
Me amendamentin e parë kushtetues, ne kërkojmë që Presidentin e Republikës t’ia japim popullit.
Ka të paktën dhjetë vjet diskutimesh, idesh dhe përpjekjesh në politikën shqiptare dhe në opinionin publik për zgjedhjen e Presidentit të Republikës nga populli. Një President i zgjedhur nga populli, dhe jo nga Kuvendi, do të jetë figurë e pavarur nga politika e ditës dhe përfaqësues i unitetit të popullit në ushtrimin e detyrave të tij të rëndësishme kushtetuese. Ne nuk kërkojmë ndryshimin e kompetencave të Presidentit, kërkojmë vetëm ndryshimin e mënyrës së zgjedhjes së tj. Në shumë vende të botës, që nga SHBA e Franca, por edhe Mali i Zi, Turqia, Sllovenia, Serbia, Rumania, Kroacia, Bullgaria, Polonia, Moldavia, Maqedonia, etj., Presidenti i Republikës zgjidhet nga populli.
Me amendamentin e dytë kushtetues, ne kërkojmë që popullit t’i bëhet e mundur të ndryshojë Kushtetutën e vendit. Me Kushtetutën aktuale, këtë të drejtë populli e merr vetëm nëse bëhen bashkë 94 deputetë, ose 2/3 e parlamentit. Por 94 deputetë është e vështirë të bien dakord. Edhe kur bien dakord, preferojnë ta ndryshojnë kushtetutën vetë, pa pyetur popullin, siç ka ndodhur në vitin 2008. Ne kërkojmë që ky numër të ulet në 2/5, pra në 56 deputetë.
Sot diskutohet fort për reformën në drejtësi, por populli shiptar e ka të pamundur të marrë pjesë në këtë proces. Me ndryshimin që ne propozojmë, popullit shqiptar i lind e drejta që të vendosë vetë për reformën në drejtësi dhe për reforma të tjera të rëndësishme.
Amendamentet i përgatitëm me Arta Daden dhe Ben Blushin, në diskutim me një grup deputetësh të spektrit të gjerë të parlamentit, të cilët po i rendis në vijim. Vazhdojmë kontaktet me shumë deputetë të tjerë dhe me grupet parlamentare, për të siguruar mbështetjen e nevojshme që këto ndryshime në Kushtetutë të miratohen.
Besojmë se këto ndryshime kushtetuese janë të domosdoshme për jetën demokratike të vendit. Prandaj do i kërkojmë opinionit publik dhe të gjithë qytetarëve të ushtrojnë presion mbi deputetët e tyre për ta mbështetur këtë nismë.
Bërthama e parë e deputetëve propozues (sipas rendit alfabetik)
Agron Duka
Arta Dade
Ben Blushi
Dashamir Shehi
Eduard Selami
Luljeta Arapi
Mimoza Hafizi
Nard Ndoka
Tahir Muhedini
Vangjel Dule
