Pajisja përgjuese “IMSI CATCHER” është përdorur edhe në disa burgje të sigurisë së lartë në vend.
Hetimi i Prokurorisë së Tiranës ndaj tre zyrtarëve të Policisë së Shtetit të dyshuar për shkelje të ligjit gjatë administrimit të kësaj pajisje është shtrirë edhe në burgje.
“Panorama” shkruan sot se organi i hetimit ka dyshime se automjeti me pajisjen përgjuese është futur në disa prej këtyre institucioneve të vuajtjes së dënimit. Për këtë shkak, me urdhër të prokurorëve të çështjes, Oficerët e Policisë Gjyqësore kanë sekuestruar librat e hyrjedaljeve në disa prej këtyre institucioneve. Sipas burimeve, rezulton se në momentet kur automjeti ku ishte montuar pajisja e përgjimit, kur ka kaluar pragun e burgjeve të dyshuara, ka qenë nën drejtimin e oficerit të Forcave të Posaçme Operacionale, Entiol Xhelilaj, një nga personat nën hetim për skandalin e përgjimeve. Janë të paktën tre IEVP ku dyshohet të ketë ndodhur ky veprim, në burgun 302 në Tiranë, në burgun e Peqinit dhe atë të Fushë¬ Krujës, gjatë vitit 2015.
Nga të dhënat paraprake ka rezultuar se në librat e hyrje-daljeve është shënuar se urdhri për lejimin e makinës me pajisjen përgjuese është dhënë nga ana e Drejtorit të Përgjithshëm të Burgjeve. Nga ana tjetër, OPGJ¬të nuk kanë sekuestruar ndonjë urdhër të Prokurorisë për ndonjë veprim të ligjshëm hetimor në institucionet e izoluara të përmendura. Hetuesit nuk kanë ende të qartë se cili ka qenë subjekti i hetimit në këto burgje, në një kohë që në periudhën në fjalë të izoluar në to kanë qenë persona të dyshuar për vepra të rënda kriminale.
