Ka pasur një moment ilariteti gjatë seancës së sotme plenare. Kjo pasi kreu i grupit parlamentar të PD Edi Paloka është ankuar se i kanë hequr një pjesë të fjalës së tij nga procesverbali i seancës së kaluar. Sipas Palokës, ishin hequr pjesët ku ai denonconte rastet flagrante sipas tij të lidhjes së mazhorancës me krimin.
Ai tha se ishte hequr kjo pjesë dhe menjëherë vijonte fjala e kryeministrit Edi Rama.
Pas kësaj kreu i kuvendit Ilir Meta tha se shqetësimi i Palokës do t’i përcillet shërbimit të Kuvendit që merret me procesverbalin.
Por ndërsa ky moment kaloi qetësisht mes Palokës dhe Metës, ka ndërhyrë ish-kryeministrin Sali Berisha.
“Ky është një akt jashtëzakonisht i rëndë”, tha ai duke e shoqëruar tonin e ashpër edhe me gjeste. Kjo deklaratë shkaktoi të qeshura pa fund e me zë të lartë në sallën e parlamentit, por më shumë dëgjohej zëri i deputetit Erion Braçe. Dhe pas ilaritetit nuk ka munguar edhe përgjigjja e Berishës. “Qeshin këta se e kanë bërë parlamentin si të mbathurat e Xhelilit”, tha ai.
“Keni bërë akte më të rënd në 25 vjet”, tha Meta duke e mbyllur këtë debat.
