Mikrofinanca shihet si një nga sektorët që mund të ndihmojë në zhvillimin e bujqësisë shqiptare, duke qenë se ka rrjetin për të siguruar financimin për këta sektorë.
Minisri i Bujqësisë Edmond Panariti tha se ka shumë arsye se përse bujqësia në Shqipëri po përballet me një sërë problemesh, mbi të gjitha me pamundësinë për të siguruar fonde. Gjatë fjalës së tij në konferencën vjetore të Qendrës Europiane të Mikrofinancës (MFC) që u zhvilluar për herë të parë në Tiranë, ministri Panariti tha se ka ardhur koha që bujqësia të orientohet nga tregu, në mënyrë që produktet të lidhen me tregjet potenciale. Panariti theksoi edhe nevojën për të bërë të mundur ofrimin e shërbimit të sigurimeve në bujqës që do të jepte më shumë garanci dhe do të ndihmonte fermerët në rastet e fatkeqësive natyrore. Sipas tij qeveria po punon që të shohë mundësinë e subvencionimit me skema për sigurimin në bujqësi.
Ndërsa përfaqësuesit e Bankës së Shqipërisë thanë se roli i insitucioneve të mikrofinancës është i rëndësishëm në kreditim. Ata thanë se ediventohen raste kur mikrofinancat kanë rezuluar më efikase se bankat komerciale.
Mbi 600 përfaqësues nga 104 fonde, institucione e banka nga 32 shtete europiane u mblodhën në Tiranë në një aktivitetet të rëndësishme të sektorit të mikrofinancës në Europë (mbështetur ndër të tjerë nga EIB, EIF dhe EFSE).
Për herë të parë, një organizëm europian financiar siç është, Qendra Europiane e Mikrofinancës (MFC) ka përzgjedhur Shqipërinë për të zhvilluar asamblenë e saj të përgjithshme vjetore në Tiranë.
Gjithashtu, ky aktivitet i rëndësishëm do të mundësojë një lobim më efikas ndaj çeljes së fondeve të BE për sipërmarrjen në Shqipëri duke ftuar në Tiranë me dhjetëra përfaqësues të niveleve më të të larta të Bashkimit Europian.
Zhvillimi i këtij takimi në Tiranë është i një rëndësie të veçantë për sektorin e mikrofinancës shqiptare. Ai konfirmon maturitetin dhe nivelin organizativ të rrjetit të mikrofinancës në shqipëri i cili përfaqëson sot mbi 20% të portofolit në numër të kredive të dhëna në vend. Financime të cilat kanë shkuar kryesisht drejt biznesit të vogël, fermerëve dhe individëve me të ardhura të ulëta duke arritur ndër vite 350,000 përfitues për më shumë se 1 miliard dollarë në Shqipëri.
