Jeshilja smerald është një ndër nuancat më super trendi për bizhuteritë dhe veshjet në verën 2016.
Mbi tapetin e kuq shumë yje kanë zgjedhur vathë e varëse smeraldi për të kombinuar veshjet e tyre të mbrëmjes. Jeshilja smerald ishte edhe protagoniste e sfilatës pranverë -verë 2016 e stilistit të njohur italian Gucci.
Por kjo ngjyrë ka dominuar edhe në sfilatat e pasarelave të stilistëve Oscar de la Renta, Balmain, Gianbattista Valli e Lanvin. Jeshilja smerald kombinohet shumë mirë edhe me ngjyrën blu elektrike për të dhënë një impakt të fortë në pamjen tuaj. Por nëse nuk dëshiron të guxosh aq shumë, mund ta kombinosh me ngjyrën akuamarinë, bojëqielli ose argjendi.
Si mund të kombinohen aksesorët? Një çantë dhe një palë këpucë jeshile smerald janë perfekte për të ndezur të zezën, blunë dhe mbi të gjitha ngjyrën e bardhë.
Ideja për të kombinuar jeshilen smerald me të bardhën i pëlqen shumë edhe nuseve.
