Gjyshi i 3-vjeçarit që u dhunua nga pronarja e kopshtit, Pashk Alia, ka rrëfyer gjithë gjendjen që ka përfshirë familjen e tij pas transmetimit të pamjeve shokuese.
Në një prononcim për 360gradë, Aliaj shpreh atë ndjenjë dyzimi mes reagimit emocional për të reaguar privatisht për këtë skandal apo për t’ja lënë në dorë drejtësisë. Ai thotë se gjithë familja po kalon stres të madh.
“Jemi duke kaluar një stres të madh. Është mëkat të shohësh lotët e fëmijës në atë formë. Ishte një dhunë kafshërore dhe nuk kam fjalë për ta përshkruar, pasi do dilja nga vetja. Sot na thirri Ministria dhe kemi besim për angazhimin e saj. Ajo na garantoi se në bashkëpunim me institucionin e Ministrisë së Shëndetësisë dhe Ministrinë së Mirëqenies Sociale do na japin kujdesin mjekësor e social të nevojshëm për djaloshin.
Ne si familje jemi mësuar ta respektojmë ligjin dhe ta zbatojmë atë. Ne e duam shtetin ligjor dhe besojmë në të. Jemi mësuar ti bëjmë gjërat sipas rregullave dhe ne besuam tek ai kopsht”, ka deklaruar ai.
Gjyshi i vogëlushit që tashmë po kalon një gjendje të vështirë për shkak të dhunës së vazhdueshme prej kohësh thotë se shpreson që përgjegjësit të mos i shmangen drejtësisë dhe që çdo gjë të bëhet sipas ligjit.
“Na thanë fjalë të mira. Uroj të mos ketë lidhje të shkurtra, dhe përgjegjësit t’i shmangen drejtësisë. Por kam besim se çështja është aq e madhe sa do jetë e vështirë të ketë lëvizje qe ta çojnë mbrapsht këtë proces ligjor. Uroj që gjërat të bëhen sipas ligjit dhe të vendoset çdo gjë sipas ligjit. Ne nuk deshëm të bënim drejtësi vetë, por emocionet që na përshkruan kur pamë videon ishin shumë të forta”, ka thënë ai.
Pavarësisht asaj çfarë ka ndodhur, Pashk Alia thotë se familja do ta mirëkuptonte një pëllëmbë duarve por jo atë dhunë kafshërore.
“Duhet kuptuar që djali është shumë i vogël dhe ta rrahësh ashtu, sikur e pamë. Ne do mirëkuptonim një shuplakë të vogël duarve, por jo në atë formë kafshërore. Ajo është një dhunë. Uroj dhe njëherë që Ministria e Arsimit, të na mbështesë në formë institucionale. Ministria e Shëndetësisë na ka mbështetur për grupin institucional për kurimin mjekësor psikologjik. Por kemi besim te Ministria e Arsimit”, tha ai.
