Pas lumit të akuzave ndaj prokurorisë dhe gjykatës për pezullimin e Drejtorit të Përgjithshëm të Policisë, Haki Çako, ministri i Brendshëm Saimir Tahiri iu shmang përgjigjes për interesin e medias nëse do të dalë në protestë kundër sistemit të drejtësisë.
Tahiri ka qenë paraditen e së mërkurës për të përkujtuar një-vjetorin e “Komisariatit dixhital”, një sistem i përparuar raportimi të ngjarjeve kriminale nga publiku, dhe pjesën më të madhe të fjalimin e kishte kundër prokurorëve dhe gjyqtarit që po shqyrtojnë çështjen e pajisjes së dyshuar përgjuese ‘IMSI Catcher”.
Në përfundim të fjalës së tij, media është e interesuar të mësojë nga Ministri i Brendshëm nëse ai e konsideron si ndërhyrje në sistemin e drejtësisë shprehjet e tij për një çështje në hetim. Tahiri i është shmangur pyetjes së parë.
Në vijim, gazetarët, jo pa e fshehur ironinë, e kanë pyetur nëse ai do të organizonte një protestë para gjykatës, për vendimin e pezullimit nga detyra të Drejtorit të Përgjithshëm të Policisë. Kjo pyetje është një paralelizëm me protestën e pak javëve më parë që organizoi një tjetër zyrtar i lartë i Partisë Socialiste, kryebashkiaku i Tiranës, Erion Veliaj, para gjykatës së Apelit Administrativ.
Edhe në rastin e Veliajt, në shënjestër ishte vendimmarrja e gjykatës për një çështje civile, me palë të interesuar Bashkinë e Tiranës.
