Ministri i Brendshëm Sajmir Tahiri ka dalë kundër prokurorisë e gjykatës, duke ofruar mbështetjen e tij ndaj drejtorit të Përgjithshëm Haki Çako menjëherë pas vendimit për pezullimin për shkak të pajisjes përgjuese.
Ministri shprehu sigurinë se as Çako dhe as dy zyrtarët e tjetë të policisë nuk kanë shkelur ligjin e as nuk kanë bërë asnjë përgjim.
“Unë jam shumë i vetëdijshëm, që drejtori i Policisë dhe dy punonjësit nuk kanë shkelur ligjin në asnjë sekondë të ushtrimit të punës së tyre, nuk kanë bërë asnjë përgjim. Jap mbështetjen time, të kryeministrit dhe qeverisë, ndaj cdo punonjësi që ndodhet këtu dhe deri në cepin më të largët të vendit, jo vetëm për drejtorin e policisë së shtetit e dy punonjësit”, tha ai.
Për Tahirin, pezullimi i Cakos është dëshmi evidente se opozita nuk e dëshiron Reformën në Drejtësi. Tahiri tha se të gjitha këto veprime të opozitës, janë në funksion të Berishës.
“Janë të shumtë ata që nuk duan që drejtësia të funksionojë në këtë vend, që fermeri të vuajë të mos fitojë pronën sepse sistemi është i korruptuar me gjyqtar dhe prokuror sepse dikush nuk do t’ia japë pronën. Janë 99% e shqiptarëve që duan që ky vend të jetë iu drejtë për fëmijët e tyre, ashtu siç po punojmë sot për policinë e gjeneratës tjetër”, u shpreh Tahiri.
Ministri i Brendshëm ka inkurajuar edhe punonjësit e policisë për të luftuar krimin dhe paligjshmërinë. “Dua t’i jap forcë dhe kurajë çdo punonjësi të policisë, luftoni me krimin, luftoni me paligjshmërinë, me informalitetit. Bëni gjithçka për të garantuar që Shqipëria nesër do të jetë më mirë falë nesh dhe betejës që po bëjmë sot”, deklaroi Tahiri.
