“Të gjitha bisneset në zonën e ish -Bllokut do të klasifikohen si të mëdha”, këtë masë e deklaroi para pak ditësh Ministri i Financave Arben Ahmetaj.
Ndërkohë, sot Drejtoria e Përgjithshme Tatimeve ka nisur përfshirjen në TVSH të bizneseve në këtë zonë, pavarësisht se ata ushtrojnë aktivitet në tregtinë më pakicë dhe deri më tani janë trajtuar si të vogla.
Një njësi e shitjes së rrobave, e cila ka marrë shkresën nga tatimet pohoi se xhiroja që ajo ka deklaruar në tatime është shumë herë më e ulët se kufiri i i përfshirjes në TVSH prej 50 milionë lekësh.
Shkresa që i ka shkuar nga tatimet është formuluar në mënyrë të tillë: “Referuar shkresës datë 5 maj 2016 të Drejtorisë së Vlerësimit te të ardhurave tatimore dhe Kontabilitetit si dhe në zbatim të ligjit për TVSH ju njoftojmë se nga periudha tatimore maj 2016 jeni të regjistruar në librat e shitjes dhe blerjes si dhe në formularin e TVSH-së në afatet e përcaktuara më legjislacion”.
Gruaja që ka në pronësi aktivitetin argumenton se, nuk mund të jetë një subjekt i përfshirë në TVSH. Nën presionin e rënies së konsumit dhe të konkurrencës nga qendrat tregtare xhiroja në tre vitet e fundit ka pësuar rënie sistematike, teksa qiraja është rritur. Gjithashtu furnizuesit e shumicës nuk lëshojnë fatura reale, ndaj këtu vështirësohet edhe shitja me TVSH.
Të përfshirë në këtë situatë shumë biznese në zonën e Bllokut janë vënë në kërkim të shitjes së aktivitetit. Në fund te prillit u kanë nisur një sërë bizneseve të vogla njoftime zyrtare ku u kërkojnë subjekteve që e kanë xhiron afër 8 milionë lekë (që është kufiri që e ndan biznesin e vogël nga i madhi) që të kalojnë vullnetarisht në biznes të madh, pasi nga verifikimet në sistemin e ri elektronik ka rezultuar se qarkullimi i realizuar nga kompania është i përafërt me kufirin e regjistrimit si biznes i madh. Si rrjedhojë, Drejtoria e Tatimeve i ka ftuar bizneset që të paraqiten në mënyrë të vullnetshme brenda datës 31 maj pranë zyrave të saj, për të bërë kalimin në biznes të madh.
Në shkresën e tatimeve shprehej e qartë se nëse bizneset do të refuzojnë të paraqiten vullnetarisht, atëherë dy punonjës të tatimeve do të paraqiten tek subjekti për të bërë verifikim dhe kontroll në vend të situatës dhe nëse do të gjejnë shkelje atëhere do të bëhen subjekt i masave ndëshkuese, shkruan Monitor.
Edhe subjekteve me xhiro afër 5 milionë lekë (që është kufiri që ndan biznesin e vogël pa TVSH me atë po të vogël me TVSH) dhe që bëjnë vullnetarisht deklarimin në biznes të vogël me TVSH u është kërkuar që të kryejnë deklarimet mujore të librave të shitjeve dhe të blerjeve dhe deklarimin e TVSH-së brenda datës 14 të çdo muaji.
