Katër prej grave të dëmtuara nga aksidenti tragjik në Krujë, ku një autobus me besimtarë ortodoksë e priftërinj mori flakë, janë nisur për kurim drejt Greqisë.
Sipas të dhënave, bëhet fjalë për V.M., 57 vjeç, M.R., 66 vjeç, L.H., 70 vjeç si dhe S.L., 69 vjeç.
Burime nga Spitali i Djegieve, pohuan se gratë janë dërguar për trajtim të specializuar në Greqi pasi kanë djegie të rënda. Të njëjtat burime bënë me dije se gjendja e grave është e rëndë, por e qëndrueshme. Transporti i specializuar ajror mjekësor tipit “MedEvac – Medical Evacuation – me personel të plotë mjekësor dhe shoqërues” u realizua në më pak se 24 orë, falë bashkëpunimit të MSH, dhe ndihmës së pakursyer dhe të çmuar të Ambasadës Greke në Tiranë dhe Qendrës Kombëtare Greke të Koordinimit të Urgjencave, E.K.A.B.
Mësohet se dy gra në moshën 70 vjeç kanë mbi 50% djegie në trup, ndërsa dy të tjera, nën 60 vjeç kanë djegie më të lehta. Aksidenti tragjik ndodhi të premten e 27 majit, ku për pasojë një grua humbi jetën dhe 11 të tjera u plagosën.
