Shoqata për mbrojtjen e të larguarve nga Administrata i është drejtuar me një letër të hapur kryeministrit Edi Rama.
Në letër, shoqata e cilëson spektakël atë që u ofrua sot për 1 qershorin duke e akuzuar kryeministrin se nuk ka ndihmuar ata fëmijë që nuk kanë mundësi të shkollohen dhe se nuk shikon ata fëmijë që sot janë të dëshpëruar se i kanë prindërit pa punë.
“Shoqata për mbrojtjen e të larguarve nga Administrata ju bën me dije ju Kryeministrit të këtij vendi: Përtej spektaklit që na ofruat sot me lekët e taksapaguesve shqiptarë për të festuar 1 Qershorin, realiteti është krejt tjetër.
Ju nuk denjuat asnjëherë të ndihmonit ata fëmijë që nuk kanë mundësi të shkollohen pasi varfëria në familjen e tyre është e përditshme. Ju nuk shihni ata fëmijë që sot të dëshpëruar nuk munden të ishin pjesë e kësaj feste pasi ju i latë prindërit e tyre pa punë.
Z. Rama realiteti në këtë vend është tragjik përtej asaj që ju na ofroni në katrorin e mediave. Iluzioni juaj ka çuar në dëshpërim mijëra familje, në mjerim pa shpëtim. Edi Rama jini përgjegjës.
Të shqetësuar nga ky realitet shpresojmë dhe urojmë që nesër 1Qershori të jetë festë për të gjithë fëmijët anembanë vendit se e keqja që ka pllakosur vendin do të largohet shpejt”, shkruhet në letër.
