Përjashtimi i ish kryeministrit Sali Berisha nga Kuvendi për 10 ditë ka ngjallur pakënaqësi edhe në partitë e tjera.
Ky vendim i Byrosë së Kuvendit ka bërë që jo vetëm Partia Demokratike të marrë vendimin për të bojkotuar Parlamentin por edhe Partia Agrare Ambientaliste e drejtuar nga deputeti Agron Duka.
“Kohët e fundit, jo për faj të opozitës, po për shkak të mazhorancës nuk arrihet një gjuhë komunikimi, por përjashtimi i një prej deputetëve të opozitës siç është zoti Berisha. Prandaj edhe opozita ka marrë vendimin që gjatë këtyre 10 ditëve kur është i përjashtuar zoti Berisha me të padrejtë të mos marrë pjesë por të bojkotojë punimet e Parlamentit. Partia Agrare Ambientaliste bashkohet me Partinë Demokratike në bojkotin e Parlamentit për 10 ditë. Natyrisht bojkoti nuk është gjëja më e mirë që mund të bëjmë por kur kjo diktohet dhe kur nuk ka rrugë tjetër, atëherë kjo është rruga e vetme. Unë uroj që mazhoranca dhe opozita të mundohen të gjejnë gjuhën e përbashkët ndërmjet tyre në mënyrë që nëpërmjet realizimit të reformave të domosdoshme jo vetëm për politikën por për gjithë shqiptarët siç është ajo e drejtësisë dhe reforma zgjedhore të mund të bëjnë që ky popull të ecë akoma më shumë përpara”, tha kryetari i PAA, Agron Duka, gjatë një takimi me strukturat në Korçë.
Po ashtu kryetari i Partisë Agrare Ambietaliste lëshoi akuza të forta ndaj qeverisë në lidhje me situatën e rëndë ekonomike të krijuar në vend. Ai i bëri thirrje Qeverisë të heqë dorë nga rruga pa krye që ka nisur.
Duka: “Ekspertët e Bankës Botërore vlerësojnë se Shqipëria është e fundit në të gjithë rajonin sa i përket uljes së varfërisë. Ngjarja e ditëve të fundit, e biznesmenit të huaj, i cili u deklaroi qeveritarëve tanë se për shkak të taksave mbytëse u detyrua të pushonte 80 punonjës duket se vërteton këtë pohim, ashtu sikurse e vërtetojnë këtë gjendje të vështirë ekonomike edhe vetë shifrat e INSTAT-it. Bankat nuk po i mbështesin më bizneset me kredi. Banka botërore na informon gjithashtu se të paktën 35 kompani të mëdha shqiptare janë në listën e bizneseve që kanë kredi me probleme”, tha kreu i PAA-së.
