Shpëtime Pitaku, gjyqtarja e Durrësit rezulton një ndër më të pasurat në sistemin e drejtësisë.
Sipas deklaratës së saj të pasurisë dorëzuar në ILDKP, gjyqtarja Pitaku vetëm për vitin 2015 thotë se ka 5 lokale, të cilët i kanë sjellë të ardhura të konsiderueshme. Nga qiratë e pesë lokaleve ka marrë shumat 9 600 euro, 360 000 lekë, 1 200 euro, 1 200 euro dhe 1 800 euro. Gjyqtarja deklaron edhe një sipërfaqe trualli 650 m2 dhe sipërfaqe ndërtimi 442 m2, në bashkëpronësi.
Nga veprimtaria si gjyqtare, zonja deklaron 1 426 425 lekë, të ardhura nga puna e bashkëshortit si mjek stomatolog privat 1 609 327 lekë, gjendje nga paga, 173 802 lekë, qira të klinikës dentare 120 000 lekë etj, shkruan Shqiptarja.com.
Zonja Pitaku pohon se ka marrë edhe një kredi në shumën 60 mijë euro, për blerjen e një shtëpie me sipërfaqe 135 m2. Gjithashtu ajo vijon të shlyejë një tjetër kredi për blerjen e një makine Audi A3.
Gjyqtarja deklaron pagesat në shumat 1 200 euro dhe 1 100 euro, pagesa të shkollës së djalit Aldo Pitaku në Universitet për vitin e katërt. Vajza e saj ka blerë dy makina me shumat 100 000 lekë dhe 400 euro. Gjyqtarja Pitaku ka qenë subjekt hetimi nga Inspektorati i Lartë i Deklarimit dhe Kontrollit të Pasurive. ILDKP ka dyshuar se zonja në fjalë ka pastruar rreth 1 milion USD.
Fatmira Hajdari
Gjyqtarja e Gjykatës së Apelit, Fatmira Hajdari, e cila shpalli të pafajshëm kryebashkiakun e Kamzës, Xhelal Mziun, deklaron pranë ILDKP një kredi prej 190 milionë lekë të vjetra, kredinë e ka marrë në vitin 2007 për rikonstruksion e një ambienti të marrë me qira, 280 m2 pranë Qytetit Studenti. Zonja thotë se këstet e kredisë i shlyen djali nga të ardhurat e lokalit Barë-Kafe, por në deklaratën e saj të pasurisë nuk eksitojnë të ardhura nga ndonjë lokal Barë-Kafe.
Ndërkaq, zonja Hajdari deklaron se gjatë vitit 2015 ka shitur një apartament për 49 888 euro. Ajo deklaron gjithashtu 720 000 lekë të ardhura nga kontrata e qerasë, depozitë bankare 1 711 lekë, pagën si gjyqtare e Apelit në Tiranë, 1 212 979 lekë, pensionin familjar për ish-bashkëshortin Azem Hajdari, 720 000 lekë etj. Ndërkaq, djali i saj, Kirjald Hajdari, deklaron 590 865 lekë pagë si i punësuar pranë Bashkisë së Tiranës.
