Një zyrtar i OSHEE-së është dënuar nga Gjykata e Tiranës, i akuzuar për korrupsion. Sipas vendimit që disponon Bold Neës, rezulton se ndaj Franc Qefalisë është regjistruar procedimi penal në nëntor të vitit të kaluar për korrupsion pasiv të personave që ushtrojnë funksione publike.
Mësohet se Alfred S., banues në Paskuqan Tiranë, është paraqitur në Policinë e Tiranës dhe ka kallëzuar se në adresën ku banon, në Paskuqan, ka një dyqan ushqimor, në të cilin punon bashkë me bashkëshorten e vet.
“Më datë 06.11.2015, rreth orës 12.00, para dyqanit të tij, ndalon një automjet me targa TR 3493 U, nga i cili zbret një djal rreth 25 vjeç, që i është prezantuar se është punonjës i OSSHE. Personi kishte dhe kartën përkatëse identifikuese të varur në qafë dhe i ka kërkuar të lexojë aparatin matës të energjisë.
Pasi ka parë aparatin matës, punonjësi i OSSHE i ka thënë se do të gjobitej në vlerën 150.000 lekë deri në 300.000 lekë, pasi ishte në shkelje, duke qenë se dyqani i tij furnizohej me kontratën e energjisë elektrike të banesës” thuhet në vendim.
Mësohet se kallëzuesi i ka treguar dokumentet, duke i thënë se ka bërë kërkesë tek kujdesi ndaj klientit qysh më datë 04.07.2015, për ndryshim tarifimi, nga familjar në biznes. Pavarësisht kësaj, punonjësi i OSSHE, i ka thënë se nëse nuk i jepte 10.000 lekë, do t’i vendoste gjobën.
Alfred S. nuk ia ka dhënë lekët atë ditë, pasi punonjësi i OSSHE i ka thënë se do të kthehej përsëri. I dëmtuari ka shkuar në polici për ta denoncuar si fakt, por aty e ka marrë në telefon bashkëshortja dhe i ka thënë se ka ardhur prapë ai personi dhe është larguar, e ndërkohë punonjësit e policisë e kanë mbajtur në vëzhgim situatën. T
ë nesermën më datë 08.11.2015, rreth orës 10.00, para dyqanit të tij, vjen e njëjta makinë dhe zbret i njëjti punonjës e fillon ta kërcënojë se përse ai ishte ankuar dhe kishte dhënë targën e mjetit të tij. Kallëzuesi i ka kërkuar ndjesë duke i kërkuar të mos i vendosë gjobën.
Punonjësi i OSSHE-së i ka thënë të dëmtuarit më jep 10.000 lekët dhe e mbyllim këtë muhabet. Alfred S. ia ka dhënë 10.000 lekët e kërkuara, ku kishte marrë paraprakisht numrat e serisë së kartëmonedhave. Punonjësit e policisë të pandehurin e kapin në flagrancë me 10.000 lekët në xhep, sapo del nga dyqani i kallëzuesit, nga ku kryhet edhe identifikimi i tij, si Franc Qefalia. Në fund, gjykata e deklaroi fajtor dhe e dënoi me 3 vite burg, por që ia pezulloi, me kusht që të mos kryejë vepër tjetër penale për 18 muaj.
