Manjani pranë studentëve: “400 vende pune presin ekspertë dhe jo militant partie”

“Kam ardhur në universitet sepse duam burime njerëzor të mençura për ta shkëputur njëherë e mirë këtë pjesë të shërbimit publik nga politika”.

Kështu është shprehur Ministri i Drejtësisë Ylli Manjani gjatë një takimi me studentët e Universitetit Politeknik lidhur me rekrutimet e ekspertëve të rinj në fushat e ekspertizës së Zyrave të Regjistrimit të Pasurive të Paluajtshme.
Manjan u tha studentëve se profesionalizmi është elementi që kërkohet më shumë se çdo gjë tjetër. Ai deklaroi se harta dixhitale ka nevojë për ekspertë të rinj. “Duhen ekspertë dhe jo militantë partie. Unë iu bëj thirrje publike që të afroheni pranë ZRPP dhe të aplikoni në 400 vendet e lira të punës që janë aktualisht. Kjo është një zyrë shumë profesionale. Procesi i dixhitalizimit të hartës kërkon profesionistë”, u shpreh Manjani.
Duke ftuar për aplikime për 400 pozicione të lira, ministri shtoi se ka nevojë për burime njerëzore të mirëtrajnuar. Ai tha se nuk është nga ata zyrtarë politikë që preferon të trokasë në dyert e partive politike për të mbushur vende pune, por shtoi se, “Kam ardhur në universitet sepse duam burime njerëzor të mençura për ta shkëputur njëherë e mirë këtë pjesë të shërbimit publik nga politika”