Kryeprokurori Adriatik Llalla raportoi në Komisionin e Sigurisë përsa i përket ekzistencës së një pajisje përgjuese e cila mund të përbëjë skandal në Policinë e Shtetit. Llalla i është përgjigjur deputetëve të PD, PS dhe LSI-së se për këtë pajisje Prokuroria e Përgjithshme ka nisur një hetim.
“Të nderuar anëtarë të komisionit, në përgjigje të ftesës suaj jam përpara këtij komisioni për t’ju informuar se Prokuroria në bazë të informacionit, hetim që ka nisur me indicie se në territorin e Shqipërisë janë futur pajisje gjurmuese apo përgjuese, nën hijen e dyshimit i them të gjitha këto, sepse jemi në fazën e hetimit. Rasti për të cilin diskutohet, hetimi ka nisur pas informacioneve të SHISH¬-it, si edhe në bazë të dhënave mediatike dhe të dhënave të tjera. Hetimi me rastin ka vetëm 5 ditë që ka filluar. Ne kemi kryer kërkime të rëndësishme hetimore. Prokuroria është angazhuar dhe ka ngritur një grup të posaçëm pune për të përfunduar në një kohë të shkurtër hetimet. Lidhur me përgjimet e viteve ’90-¬të hetimet nuk janë përfunduar”, tha Llalla.
Kryeprokurori kërcënoi më tej me nisjen e procedimit penal edhe veprën penale të moszbulimit të së vërtetës, nëse Prokuroria do të ketë pengesa nga qeveria apo zyrtarë të ndryshëm në këtë hetim.
